إلى كل زوج مسافر .. وسايب مراته لوحدها هنا .. 💔
أرجووك .. أرجوووك كمان مرة .. لو عندك فرصة 1% إنك تاخدها معاك اوعى تتردد ..
مش مهم تحوش .. مش مهم ولادك يدخلوا مدارس غالية .. مش مهم أي حاجة .. والله العظيم وجودكم مع بعض وتربية الولاد ما بينكم أهم من كل الكلام ده ..
حضرتك الناس بتتجوز في المقام الأول بهدف اعفاف نفسها ..
فلما تبقى الزوجة بتتحايل على جوزها وتقوله إنها محتاجاه جنبها ومش قادرة تصبر ، وهو يطنش ويقولها عيشي زي ما الستات عايشة ، وهو شايف بعينيه كمية الفتن اللي حواليها ، يبقى عنده مشكلة في تفكيره !
ولما الست يبقى جوزها محتاجلها ومترضاش تسافرله علشان عاوزة تقعد متدلعة في بيت أهلها هي وعيالها .. وهي عارفة إن الفتن حواليه في كل مكان .. يبقى متزعلش لما تكتشف إنه راح اتجوز عليها !!
من فترة شوفت مشكلة بيحكوا فيها عن واحدة جوزها مسافر وهي شايلة مسئولية الولاد كاملة طول الوقت .. وحتى في الإجازات مبترضاش تروح لجوزها علشان توفرله الفلوس وبتيجي على نفسها .. واكتشفت بعدها إنه متجوز عليها .. ويقولولك #غدار !!
لأ حضرتِك هو مش غدار .. هو راجل ومحتاج مراته جنبه وهي مش راضيه .. يبقى من حقه يشوف واحدة تانية يعيش معاها في الحلال بدل ما يغضب ربنا ..
طب ده الراجل وعنده حل .. الست بقى تعمل إيه ؟
الزوجة اللي هي إنسانة وعندها احتياجات بردو ومتجوزة في الأساس علشان تعف نفسها بالحلال .. تعمل إيه لو جوزها مش راضي ياخدها معاه ؟
تعيش ازاي كإنسانة سوية وتربي أولادها تربية صالحة وهي نفسها تعبانة ؟
ومحدش يقولي الناس زمان كانوا بيعيشوا ..
دلوقتي مينفعش يتقارن بزمان ..
دلوقتي الفتن ماليه الشارع والنت .. والنفوس ضعفت .. والحياة بقت أصعب .. وبردو متعرفوش زمان كانوا عايشين عادي ولا موجوعين وساكتين وخلاص
#سيدنا_عمر سأل ابنته حفصة : كم أكثر ما تصبر المرأة عن زوجها ؟
فقالت: ستة أشهر ، أو أربعة أشهر
فقال عمر: لا أحبس أحدًا من الجيوش أكثر من ذلك .
يعني شوفوا أعطى للموضوع أهمية كبيرة ازاي .. ❤️
وأنتوا أكتر ناس المفروض تكونوا حاسين ببعض وبتعملوا كده !
ياريت بلاش نتهاون في الموضوع ده ..
اللي الفرصة بالنسباله مستحيلة .. يبقى ربنا يعينه ويقويه 😥
إنما اللي عنده فرصة حتى لو بسيطة .. يبقى لازم يستغلها وبلاش نظام جواز شهر كل سنة ده علشان حياتكم هتتأثر جامد ، وهتتعودوا على غياب بعض ، وهتتحرموا من حاجات كتير انتوا في غنى عنها ..
#اللهم_بلغت .. 🌸