زي اليومين دول سنة 2002 نزل فيلم الزعيم عادل امام "أمير الظلام" واللي جه بعد غياب سنتين من آخر أفلامه "هاللو أمريكا"..الفيلم ده يُعتبر بداية مرحلة جديدة لعادل امام..
سواء في التعامل مع رامي امام كمخرج..التعامل مع 4 كُتاب للعمل..القصة كانت لخالد سرحان وحمدي يوسف..السيناريو والحوار لتامر عبد المنعم وعبد الفتاح البلتاجي..وتامر عبد المنعم وخالد سرحان شاركوا في التمثيل برضه..كمان كان فيه تغيير في ظهور عادل امام في سن قريب من سنه الحقيقي على عكس "هاللو أمريكا" آخر ثلاثية بخيت وعديلة اللي استمر فيها بدور الشاب الثلاثيني "بخيت حنيدق المهيطل" على الرغم انه وقتها كان تم 60 سنة..
الفيلم لما نزل اتوجهتله اتهامات بالاقتباس من فيلم آل باتشينو الشهير Scent of a Woman..كشخصية الكفيف اللي بيعمل حاجات غريبة..وكمان اقتباس بوستر الفيلم من فيلم تاني لآل باتشينو "الاب الروحي 3"...
اتميز الفيلم بأغنية مدحت صالح "النور مكانه في القلوب" من كلمات مجدي كامل وألحان خالد حماد واللي حققت نجاح وانتشار كبير..
#الكتابة_صنعتنا
