الساعة ٧ صباحا وزي كل يوم صحيت علي صوت زعيق وخناق جاري علاء مع مراته !!!
ورغم اني من محافظة تانية وعايش في شقتي دي لوحدي لكن خناق علاء ومراته كل يوم الصبح بيصحيني قبل صوت المنبة ، ولما برجع من شغلي بعد المغرب اسمع صوت ضحكهم وهزارهم وكل يوم كده !!!
عملت كوباية شاي وفطرت ونزلت روحت شغلي زي كل يوم وبعد المغرب كنت خلصت شغلي ورجعت البيت .
دخلت البيت وحضرت لنفسي الاكل وفتحت التليفزيون وقعدت اتفرج وانا باكل ، لكن النهارده كان مفيش اي صوت من شقة علاء !!
وعدا اكتر من شهر وشقة علاء مفيش فيها اي صوت !! قولت يمكن يكونوا سافروا مثلا او تكون مراته. زعلانة عند اهلها .
وفي يوم رجعت من شغلي و بعد العشا نزلت قعدت علي القهوة شوية .
وبعد ربع ساعة وصل علاء القهوة وسلم عليا وقعد .
علاء قاعد ساكت ، قولتله : مالك يا علاء ساكت ليه ؟
قالي : انا واقع في مشكلة كبيرة اوي يا وائل .
: خير احكي وفضفض احنا جيران والجيران لبعضها يمكن اقدر اساعدك .
: ربنا اللي يعلم يا وائل رغم انك مش من هنا وساكن هنا من سنتين بس لكن حاسس انك مننا وكأني اعرفك من زمان .
: الله يخليك يا علاء وانا كمان بعزك زي اخويا بالظبط .
: انا طلقت ام مهند .
: لاحول ولا قوة الا بالله .طيب ليه يا راجل دا انتو معاكوا ٣ عيال !!!
: اللي حصل بقي ، لحظة شيطان .
: حاول ترجعها علشان الاولاد ملهومش ذنب . وتعالي علي نفسك شوية وهي تيجي علي نفسها شوية علشان المركب تمشي .
: يا ريت دا انا بحبها اوي لكن للأسف مش هينفع ارجعها ، دي الطلقة التالتة .
: اووووب !!! وليه اتسرعت وطلقتها يا راجل !! مش انت كنت عارف انها الطلقة التالتة !!
: بقولك لحظة شيطان يا وائل .
: طيب بص انا هقولك ، أسال يمكن تكون يمين الطلاق المرة دي موقعش .
: وهو انا مستني حد يقولي !! انا سألت وحكيت كل اللي حصل وقالولي ان كده ال ٣ طلقات وقعوا .
: الصراحة يا علاء انا مش عارف اقولك ايه ؟
: عارف الحل الوحيد علشان نرجع لبعض هو المحلل .
: طيب ما كويس ، اهي المشكلة اتحلت .
: لأ مش هينفع .
: ليه بقي ؟
: اصلنا احنا الاتنين رافضين .
: طيب ورافضين ليه ؟؟ مش انتوا الاتنين عاوزين ترجعوا لبعض ؟؟
: ايوه بس المحلل له شروط احنا الاتنين مش موافقين عليها .
: يا عم علاء خلص في الموضوع ، هات واحد يكتب عليها وتاني يوم يطلقها وخلصت الحكاية .
: يا ريت ينفع !! في شرطين اصعب من بعض .
: ايه هما ؟
: اولا لازم الجواز يكون حقيقي يعني تحصل دخلة وثانيا لازم الجواز ميكونش محدد بميعاد للطلاق .
: طيب ما تشوف حد بتثق فيه يبقي محلل وميطلعش سرك بره .
: انت بتقول ايه يا وائل !! اذا كنت انا بغير عليها من الهوا هخلي واحد غريب ازاي يلمسها ؟!!
: عندك حق ، ده كمان ممكن ميرضاش يطلقها .
: لأ ما انا هاخد عليه ضمان انه يطلقها من غير ما نحدد المدة ، لكن لو استهبل فيها هضغط عليه بالضمان اللي هيبقي معايا .
: قصدك يعني تاخد ابصال امانة مثلا وبعد اسبوع او اسبوعين او شهر لو مش طلقها تضغط عليه به ؟؟
: ايوه يعني اول ما يتخانقوا مثلا يطلقوا علطول من غير ما نحدد وقت معين .
: فكرة معقولة .
: لكن المشكلة في موضوع الدخلة ده !!! انا مستحيل اوافق وهي كمان رافضة ومش موافقة .
: طبعا عندها حق ، اي واحدة مكانها هترفض طبعا ، طيب ما هو المحلل ده ممكن يتجوزها بدون ما يدخل عليها .
: ازاي بقي ؟؟ ده شرط من شروط الجواز .
: مش في ناس بتتجوز ومش بيدخلوا علطول والدخلة بتتأخر وبيختلفوا ويطلقوا ؟؟
: اه بس ده لما بيكون العريس عنده مشكلة !!
: طيب تمام ، يتجوزوا وكأن ان هو عنده مشكلة ويفضلوا مع بعض فترة صغيرة بدون دخلة وبعد كام يوم مع اول خناقة يتطلقوا .
: تفتكر ده ينفع ؟؟
: ايوه ينفعع ، هقولك انت تشوف واحد يكون عنده مشكلة من النوع ده يقوم بالمهمة دي علشان تبقي مطمن .
: ازاي يا عم وائل ؟؟ !!! وانا هعرفه ازاي ده ؟؟ والحاجات دي بتتداري يعني محدش هيعرف انه عنده مشكلة .
: خلاص شوف اي حد يتجوزها تكون واثق فيه ويعيش الكام يوم دول معاها وكأنه عنده مشكلة وبعدين يطلقها مع اول خنافة بينهم .
: طيب ايه رأيك يا وائل ؟
: في ايه ؟
: تقف جنبي وتقوم انت بالمهمة دي ؟
: نعم ؟؟؟ انت بتقول ايه ؟؟
: مالك بس !! دي خدمة و هتقضيهالي . وانا بصراحة مش هضمن حد غيرك .
: انت بتقول ايه بس !!! انت فاكرني ايه علشان عندي ٣٢ سنة ولسه متجوزتش ابقي عندي مشكلة ؟؟ !!
: لا والله مش قصدي .
: علفكرة انا راجل اوي .
ضحك علاء وقالي : يا عم والله ما قصدي ، انا اقصد اني واثق فيك وفي اخلاقك ، دا انت من ساعة ما جيت وانا شايفك اخلاقك عالية ومحترم .
: بس انا متجوزتش قبل كده ، يعني اول جوازة ليا ابقي محلل ؟!!! مينفعش .
: دي خدمة وانا مش هنسهالك ابدا .
: طيب اقولك ايه بس !! سيبني يومين افكر وارد عليك .
↚
رجعت البيت وانا بفكر في كلام علاء اللي كان مفاجأة عمري ما توقعتها .
وفضلت متردد يومين ، شوية افكر اني اساعد علاء في مشكلته وشوية كرامتي تقولي لأ مينفعش ده حتي عيب في حقي كراجل !! وشوية افتكر مرات علاء وجمالها وحلاوتها فالشيطان يوزني اني اوافق وتبقي فرصة !! وارجع تاني اقول لنفسي ماهي هتبقي مراتك واعمل اللي انت عاوزه !! وارجع تاني اقول يعني بعد الراجل ما يأتمنك علي مراته تخونه !! وارجع افتكر مراته وجمالها وحلاوتها والشيطان يوزني !! وشوية وكرامتي تقولي ارفض . وفضلت كده يومين مش عارف ارد عليه !!
و رجعت من الشغل بعد اليومين وانا قاعد في شقتي رن جرس الباب ، فتحت لقيت علاء قولتله : اتفضل .
دخل علاء وقعد وبعدين قالي : عملت ايه في موضوعنا ؟؟
قولتله : مش عارف يا علاء لسه بفكر .
: يا عم وائل الموضوع مش محتاج التفكير ده كله ، انت مش بتقول بتعتبرني زي اخوك ؟؟
: ايوه طبعا . ( للكاتب /عادل عبد الله )
: طيب خلاص وافق بقي علشان خاطر اخوك .
: طيب و ام مهند هتوافق ؟؟
: ايوه حنان قولتلها وهي وافقت خلاص خصوصا لما قولتلها عليك وشرحت لها اللي هيحصل بالظبط .
: طيب يا ابو مهند موافق وامري لله ، بس خلي بالك انا موافق علشان خاطرك بس فياريت بقي محدش يعرف غيرنا علشان شكلي قدام الناس .
: ازاي بقي !! ده الاشهار من شروط الجواز علشان يبقي شرعي !!
: كفاية انت واهلها وكام واحد كده يعرفوا ويبقي تم الاشهار ، انما هنا يا ريت الجيران متعرفش .
: حاضر يا عم وائل طلباتك اوامر ، وعلشان الجيران متعرفش احنا عندنا شقة تانية قفلنها ومش بنروحها الا كل فين وفين ، بعد كتب الكتاب هتروحوا تقعدوا فيها .
:تمام ، خلاص انا موافق .
: علفكرة انا كنت هعرض عليك فلوس لكن انا عارف انك كنت هترفض . ( للكاتب / عادل عبد الله )
: عارف يا علاء لو كنت عملت كده انا كنت رفضت الموضوع كله .
وبعد نهاية شهور العدة بيوم لقيت علاء جاي واخدني واخدنا المأذون معانا وروحنا لحنان عند اهلها .
كنت اول مرة اشوف اهلها ، ابوها وامها ناس طيبين اوي وعندها كمان اختين متجوزين كانوا موجودين مع اجوازهم .
خرجت حنان وقعدت معانا وكان واضح عليها الكسوف ، ضحكت من جوايا وقولت لنفسي ( هي عاملة فيها عروسة بجد ولا ايه !! ) .
المأذون كتب الكتاب وبعدين علاء قالي : متشكرين يا وائل وزي ما اتفقنا بقي ؟؟
قولتله : ايوه طبعا .
قالي : طيب خد حنان والاولاد و اتفضلوا روحوا شقتكم و جوز اختها هيوصلكم بعربيته .
المأذون كان منتبه لكلامنا فقاطعنا فجأة وقال : اولاد مين ؟
علاء قاله : اولاد العروسة .
المأذون : وهما اولاد العريس بردو ولا اولاد راجل تاني ؟
علاء : اولاد راجل تاني .
المأذون : انا شامم ريحة محلل في الجوازة دي ؟؟
ابو حنان : الصراحة ايوه ، وفيها ايه ؟
المأذون : المحلل علشان يكون حلال لازم الدخلة تتم ويحصل خلوة شرعية .
علاء : ايوه طبعا كل ده مفهوم .
المأذون : يبقي الاولاد يفضلوا هنا ومش يروحوا معاهم لان الاولاد ممكن تمنع الخلوة الشرعية .
( علاء ظهر عليه الغضب لأنه كان عامل حسابه ان الاولاد هيكونوا معانا ) .
نزلت انا و علاء ومعانا حنان واختها وجوز اختها وركبنا العربية لحد ما وصلنا ، نزلت حنان وطلعت الشقة علطول لوحدها ، وعلاء اخدني علي جنب وقالي : علفكرة يا وائل انا مش رضيت امضيك علي ايصال امانة ولا اخد عليك ضمان لأني واثق فيك يا ريت تثبتلي ان ثقتي في محلها .
: عيب عليك يا علاء . احنا اتفاقنا وده كلام رجالة .
: وائل اوعي الشيطان يضحك عليك ويخلينا نخسر بعض ؟
: يا عم عيب عليك بجد متخافش ثقتك في محلها .
: يعني توعدني انك مش هتخلف اتفاقنا ؟
: يا عم علاء لو خايف كده اطلقها دلوقتي ونخلص .
: يا ريت ، للأسف مش هينفع .
: طيب اطمن يا علاء نام واطمن ومتشغلش بالك . ( للكاتب / عادل عبد الله )
: ماشي يا وائل .
: تعالي بقي طلعني علشان مش عارف الشقة .
: بلاش انا اطلعك . اطلعي يا وفاء ( اخت حنان ) عرفي وائل الشقة .
طلعت انا ووفاء لحد ما وصلنا الشقة وحنان فتحت الباب وبعدين وفاء اختها قالتلها : عاوزة حاجة يا حنونة انا ماشية ؟
ردت حنان : لا شكرا يا حبيبتي مع السلامة .
اغرب حاجة اني لاحظت ان وفاء ضحكت لحنان وغمزتلها !!!!!!
↚
حنان فتحت الباب وبعدين وفاء اختها قالتلها : عاوزة حاجة يا حنونة انا ماشية ؟
ردت حنان : لا شكرا يا حبيبتي مع السلامة .
اغرب حاجة اني لاحظت ان وفاء ضحكت لحنان وغمزتلها !!!!!!
بمجرد ما دخلت الشقة وقفلت الباب كانت حنان دخلت اوضتها وقفلتها بسرعة .
بصيت في الساعة كانت لسه حوالي الساعة ٩ بالليل .
الشقة كانت كبيرة وفيها ريسبشن كبير والاوضة اللي دخلتها حنان واوضة تانية مقفولة واوضة تالتة كبيرة بس فيها سرير ودولاب صغيرين حطيت شنطتي فيها .
دخلت الحمام واخدت شاور وطلعت ودخلت المطبخ اعمل قهوة وانا بضحك من الموقف العجيب اللي عمري ما تخيلت انه يحصلي !! وبقول لنفسي ( يعني يا واد يوم ما تتجوز تتجوز واحدة زي القمر كده و تكون محلل وبس !! وحتي مش هتقدر تلمسها ولا تاخد حقك كزوج !!!! و حتي القهوة بعملها لنفسي !! ده المفروض ان في الوقت ده اكون انا وعروستي بنهزر و بنضحك مع بعض ومبسوطين !!! ) .
قعدت وفتحت التليفزيون و ماسك الريموت وبقلب في القنوات فجأة الموبايل رن !!!! لقيت علاء اللي بيتصل !!!!!
: في ايه يا علاء ؟ ( بقلم / عادل عبد الله )
: بطمن عليك يا عم !! يعني بلاش ؟؟
: انت بتهزر ، صح ؟ انت لسه سايبني من اقل من ساعة !!!
: بشوفك بتعمل ايه ؟
: يا علاء انا مقدر شعورك بس مش كده !! اعقل شوية .
: معلش يا وائل انت متعرفش انا حاسس بأيه دلوقتي .
: يا عم قولتلك ريح بالك ونام واطمن . ولا انت مش بتثق في كلامي ؟
: لا خلاص ماشي يا وائل ، طيب نام علطول يا وائل .
ضحكت وقولتله : ماشي .
قالي : طيب اديني حنان اقولها حاجة .
: اقفل يا علاء بدل ما اقولك كلمة وحشة .
قعدت نص ساعة وهي في اوضتها ولا حس ولا خبر !!! ( بقلم / عادل عبد الله )
حسيت اني جعان روحت لابس ونازل اشتريت اكل لاتنين ( قولت لما اطلع هعزم عليها ولو رفضت هبقي اشيله في التلاجة ) .
اشتريت الاكل وطلعت ونسيت اني مش معايا مفتاح !! رنيت الجرس راحت حنان فاتحة الباب وجريت تدخل اوضتها .
وقفت ورا باب الاوضة وقولتلها : علفكرة يا مدام انا جايبلك عشا معايا .
: ونزلت ليه وتعبت نفسك ما التلاجة مليانة اكل .
: عادي مفيش فرق . هتيجي تتعشي معايا ؟
: لا انا مش جعانة دلوقتي .
: طيب سؤال معلشي انتي قفلة الباب خوف ولا كسوف ؟؟؟
: ايه ؟؟ لا لا ، عادي ولا ده ولا ده .
: طيب ما تفتحي الباب وتيجي تتعشي معايا ؟
: طيب اتعشي انت وانا هخرج اعملك الشاي .
قعدت اكل لوحدي وهي بعد ربع ساعة خرجت من اوضتها .
اتفاجئت بمنظرها !! كانت لابسة عباية واسعة و مقفلة وحجاب !! قولت في بالي دي اكيد خايفة مني ، معقول هفضل قاعد مع واحدة في نفس الشقة لوحدنا وهي خايفة مني بالشكل ده !!
سمعتها بتسألني : انت بتحب تشرب الشاي سكره ايه ؟
قولتلها : معلقتين سكر لو سمحتي .
لما جابت الشاي قولتلها : علفكرة ده نصيبك في العشا سبته لما تحبي تاكلي .
: ما انا قولتلك التلاجة مليانة اكل . ( بقلم / عادل عبد الله )
( كانت بتكلمني وبصة في الارض ) .
: مش معقول هتفضلي قافلة علي نفسك الاوضة طول الوقت خصوصا ان انا بكره كمان عندي اجازة من الشغل !! تعالي اقعدي نتكلم شوية .
: هنتكلم في ايه ؟؟
: نتكلم في اي حاجة ، ولا تحبي انزل انا علشان تاخدي راحتك ؟؟
: لا خلاص انا هقعد .
: طيب انا بحب اتفرج علي الافلام الاجنبي هتتفرجي معايا ولا اجيبلك فيلم عربي ؟
: زي ما تحب .
شغلت فيلم اجنبي و فضلت حنان قاعدة ساكتة ومربعة ايديها علي ابعد كرسي في الريسبشن !!
قولتلها : انتوا اتطلقوا ليه ؟
( وكأني فتحت حنفية مقفولة من سنة )
بدأت حنان تتكلم وتحكي علي مشاكلها مع علاء لحد ما وصلت لنقطة الغيرة وانه بيغير عليها بشكل مبالغ فيه جدا .
قولتلها : ماهو لازم يغير عليكي اكتر من كده كمان انا لو مكانه ومتجوز قمر بالشكل ده كنت اقفل عليكي ومخليش اي عيون تشوفك الا عيوني انا بس .
ضحكت حنان ووشها احمر ووطت وشها في الارض .
قولتلها : ايه ده انتي بتتكسفي !!
↚
ضحكت حنان ووشها احمر ووطت وشها في الارض .
قولتلها : ايه ده انتي بتتكسفي !! صحيح انا عاوز اسألك سؤال .
: اتفضل .
: هي اختك ضحكت وغمزتلك وهي نازلة ليه ؟؟
: متاخدش في بالك اصل وفاء دي هبلة .
: طيب يا ريت تاكلي بقي علشان مش احس بالذنب . انا حاسس ان انا اللي منعك من انك تاخدي حريتك .
: لا ابدا .
: طيب اتفضلي كلي بقي قبل الاكل ما يبرد .
قعدت تاكل وانا قولتلها : ايه رأيك تشربي القهوة معايا من ايدي ؟ انا بعمل قهوة محصلتش .
قالتلي : مش عاوزة اتعبك .
قومت ودخلت المطبخ وعملت فنجانين قهوة ، كانت هي خلصت اكل .
وقعدنا نشرب القهوة واحنا بنتكلم . وشوية والموبايل رن تاني !!!
ببص في الموبايل لقيت علاء بيرن عليا تاني !!! فضحكت اوي وكنسلت عليه وقفلت الموبايل .
حنان سألتني : علاء بيتصل عليك تاني ، صح ؟
: ايوه .
: و مش رديت عليه ليه ؟
: دي بيتصل عليه كل شوية !! ده كده هيفضل يتصل للصبح !!
: انت قفلت الموبايل ؟
: ايوه .
ضحكت وقالت : هتلاقيه جاي دلوقتي .
: مش معقول !!
: هتشوف دلوقتي . وعموما انا هدخل انام ولما ييجي ابقي قابله انت .
دخلت حنان تنام وقفلت باب اوضتها وانا فضلت اتفرج علي التليفزيون .
وبعد اقل من نص ساعة فعلا علاء كان بيرن علي الباب !!!!! ( بقلم / عادل عبد الله )
قفلت التليفزيون ولخبطت السرير الصغير ( كأني كنت نايم عليه ) وروحت فتحتله الباب وانا بدعك في عينيا كأني كنت نايم .
علاء دخل بسرعة وقالي : انتوا بتعملوا ايه ؟
: ايه يا علاء انت مجنون !! مالك في ايه ؟؟
: لما اتصلت عليك مردتش عليا ليه يا وائل وقفلت الموبايل ؟؟
: يا علاء كنت نايم وانت بصراحة مش طبيعي لو سبت الموبايل مفتوح هفضل طول الليل ارد علي تليفوناتك .
: انت كنت بتعمل ايه يا وائل ؟
اخدت علاء من ايده ودخلته الاوضة وقولتله كنت نايم هنا ( وانا بشاور علي السرير الصغير ) .
قالي : وهي فين ؟
: في اوضتها . تحب تشوفها ؟؟؟!!
: ايوه . ( بقلم / عادل عبد الله )
: طيب انزل يا علاء علشان كده عيب في حقي ، وانا كل ده ساكت علشان مقدر شعورك ، بس كفاية كده !! لو مش هتعقل بقي هطلقها والله دلوقتي ويبقي موضوع المحلل فشل وابقي دور علي حد غيري .
نزل علاء بعد ما وعدته لعاشر مرة اني مش هقرب منها !!
بعد ما نزل علاء قعدت افكر في كلام حنان واسلوبها الصراحة هي حلوة في كل حاجة سواء شكل او شخصية او اسلوب بصراحة تحفة .
وبعدبن خبطت علي باب اوضتها ردت عليا بصوت عالي وهي خايفة : في ايه ؟؟
: لا ابدا بشوفك لو لسه صاحية نقعد نتكلم شوية .
: لا انا كنت نايمة .
: طيب خلاص انا اسف تصبحي علي خير .
وقعدت قدام التليفزيون في الريسبشن مش عارف انام و كل شوية افكر في حنان وافكر اصحيها واخد حقي منها كزوج !!
و فجأة لقيت حنان بتنادي عليا....
↚
وقعدت قدام التليفزيون في الريسبشن مش عارف انام و كل شوية افكر في حنان وافكر اصحيها واخد حقي منها كزوج !!
و فجأة لقيت حنان بتنادي عليا
وبتقولي : ايه ده انت نمت هنا ليه ؟ منمتش علي السرير الصغير جوه ليه بدل ما تنام هنا كده !!!
قولتلها : انا مش عارف انا نمت ازاي ولا نمت امتي !!
: طيب انا عملت الفطار قوم علشان تفطر .
قولتلها : عارفة احلي حاجة ايه في الدنيا ؟
: ايه ؟؟؟
: ان الواحد يصحي يلاقي حد قمر كده قدامه .
ضحكت وقالتلي : قوم انا خمس دقايق والاكل هيكون جاهز قدامك .
قومت وقعدت علشان افطر و سألتها : انتي مش هتفطري معايا ؟
قالتلي : لا انا فطرت .
: ايه ده انتي مش عاوزة تاكلي معايا ولا ايه ؟
: لا مش كده ، انا فطرت علشان صاحية من بدري وقولت اسيبك تنام براحتك .
وبعد الفطار بدأنا نتكلم ونهزر كتير لكنها كانت بتتعامل معايا بحذر وبعدين قولتلها انا هنزل عاوزة حاجة من تحت ؟
: لا شكرا ، انت رايح فين ؟
: هروح مشوار واهو بالمرة اسيبك شوية تاخدي راحتك .
نزلت اتمشي و بعدين روحت جبت هدوم علشان اعرف اقعد في البيت .
رجعت بعد ساعتين رنيت الجرس لكنها مش فتحت !!
فضلت ارن الجرس كتير اكتر من خمس دقايق لحد ما قالتلي من ورا الباب : انا هفتح الباب بس متدخلش علطول .
قولتلها : ليه ؟
: علشان كنت باخد شاور و خرجت بسرعة لما رنيت الجرس كتير .
: طيب تمام .
فتحت الباب وجريت علي اوضتها وانا دخلت يادوب لمحتها وهي داخله كانت لفة البورنس علي جسمها ورجليها معظمها باينة !!
قولت في بالي ( يخربيت جمالك ده انتي هتخليني اغير كلامي مع علاء ) .
وبعد ربع ساعة خرجت من اوضتها و سألتني تحب تشرب قهوة ؟
قولتلها : يا ريت . استني اقوم اعملها انا .
: لا مينفعش وانا موجودة .
: طيب اعمليها انتي المرة دي وانا هعملها المرة الجاية
دخلت تعمل القهوة وانا قعدت اتفرج علي فيلم اكشن اجنبي .
سمعت صوتها بتتكلم في المطبخ !!! استغربت وقومت اشوفها بتكلم مين ، من الكلام عرفت انها بتكلم وفاء اختها وبتقولها
: لا بصراحة ده طلع محترم وذوق اوي .
: ..........
: بطلي يا بت ، هو علشان محترم يبقي كده !!
:..........
: والله ما بكدب عليكي ، انا نمت لوحدي وهو نام لوحده .
: .........
: ايوه هو فعلا جوزي .بس مينفعش .
: ..........
: لا لا بالعكس ده ذوق جدا وبيهزر ويضحك .
: .........
: لا الصراحة هزاره كله من بعيد لبعيد .
: ............
: لا والله بالعكس ، بس هو مش عاوز يخلف وعده مع علاء .
: .............
: ده احساسي .
: ...........
: بطلي يا قليلة الادب ، لأ طبعا لابسه حجاب وواسع علطول .
: ............
: مش معايا راجل غريب في البيت ؟!!
: .............
: ايوه عارفه انه حلال بس مينفعش بقولك .مش عاوزة حد تاني يلمسني .
: ...........
: يا بت عارفه انه جوزي و حلال بس مش هينفع .
: ...........
: طيب سلام القهوة هتفور .
بعد ما قفلت حنان مع اختها رجعت انا بسرعة قعدت مكاني علشان متعرفش اني سمعت كلامها .
من ردودها علي اختها فهمت كلام اختها وزعلت ان كده بقي شكلي وحش اوي .
وفكرت لو مارست حقي معاها ييبقي حلال مش حرام !!! ايه بقي اللي يخليني ماخدش حقي ؟؟ مفيش غير وعدي مع علاء !!
بعد كلامها مع اختها كنت بفكر ازاي هعمل كده وياتري هي هتوافق ولا هترفض ؟؟ ولو رفضت اعمل ايه وقتها ؟؟ اتراجع و لا اكمل ؟؟ ولو قالت لعلاء هتبقي مشكلة !!!
قعدت اشرب القهوة واتفرج علي الفيلم وانا سرحان .
وهي كانت قاعدة بعيد وسألتني كذا مرة مالك ؟ في حاجة مضيقالك ؟
: لا ابدا .
: طيب لو في حاجة مضيقاك هنا قول .
فضلت سرحان وهي بدأت تشك اني سمعت مكالمة اختها !!!
شوية وعلاء اتصل رديت عليه وبعد ما قفلت معاه قعدت سرحان وهي سألتني : علاء اللي اتصل ؟
: ايوه .
: كان عاوز ايه ؟
: بيطمن كالعادة .
ضحكت وقالتلي : متردش عليه تاني .
: ليه ؟
: انا حاسة انه ضايقك باتصالاته كل شوية .
: خلاص مش هرد عليه .
: واضح انك مش عاوز تتكلم وعاوز تقعد لوحدك ، انا هدخل انام شوية .
: لا ابدا بالعكس .
: طيب علي العموم انا داخله انام شوية ولما تحب تتعشي صحيني .
دخلت اوضتها وقفلت الباب عليها وانا قعدت لوحدي اتفرج علي التليفزيون وماسك الموبايل بلعب فيه وعدا اكتر من ساعتين او تلاته .
حسيت اني عاوز اكل بس محبتش اصحيها علشان مش اقلقها .
فتحت التلاجة و طلعت منها اكل ودخلت المطبخ اسخنه .
وانا واقف في المطبخ حنان صحيت واتفاجئت بيا وانا في المطبخ !!
قالتلي : ايه ده !! لما انت عاوز تاكل مش صحيتني ليه ؟؟
: ابدا محبتش اقلقك .
: لا ابدا انا كنت صاحية ومنمتش كنت ماسكة الموبايل ، قولت اسيبك علي راحتك ، اخرج بقي وانا هجهز الاكل .
: لا ابدا خلاص انا هجهزه .
: لا والله مينفعش ..
ودخلت حنان المطبخ و جت تاخد الاطباق من ايدي ايديها لمست ايديا !!! اول ما لمستني حسيت بكهربا في جسمي !!! وتقريبا هي كمان !!! راحت بعدت علطول وقالتلي : اتفضل بقي روح اقعد وانا هجهزلك الاكل .
خرجت من المطبخ بسرعة قبل ما اتهور وروحت قعدت في الريسبشن .
حنان حضرت الاكل ومشيت !! قولتلها : بردو مش هتاكلي معايا ؟؟
قالتلي : صدقني مفيش حاجة انا بس عاوزاك تاكل وتاخد راحتك .
: ومين قالك اني مش هاخد راحتي وانتي قاعدة !! بالعكس دا انتي هتفتحي نفسي . انا طول الوقت باكل لوحدي .
: صحيح انت ليه عايش لوحدك ؟
: اهلي كلهم في البلد وانا شغلي هنا وبسافرلهم كل اسبوعين تلاته اقعد معاهم كام يوم وارجع .
: انا عندي سؤال فضولي شوية .
: عادي اسألي براحتك .
: انت ليه مش اتجوزت لحد دلوقتي ، حتي علي الاقل تلاقي ست تعملك اكلك وتشوف طلباتك وتبقي ونيس بدل ما انت عايش لوحدك ؟؟
ضحكت وقولتلها : لما قلبي يدق .
اندهشت اوي من كلمتي وقالتلي : معقول يعني انت مش هتتجوز الا لما تحب ؟؟!
: ايوه الانسانة اللي هكمل معاها حياتي لازم اكون بحبها .
: غريبة اوي !!!
: هو ايه اللي غريبة اوي ؟
: انك بتفكر برومانسية .
: ودي فيها ايه ؟
: لا ابدا بس انا من ملامحك كنت فاكرة انك واخد حياتك جد اوي ومش بتفكر في الحب والمشاعر والكلام ده .
: لا بالعكس ، انا اللي تعبني في حياتي تفكيري الرومانسي .
: وانت لحد دلوقتي عمرك ما حبيت ؟
: حبيت مرة قبل كده .
: وبعدين ؟
: لأ . ده موضوع كبير اوي .
: لو مفيش احراج ممكن تحكي احنا كده كده فاضيين . ولو مش عاوز تحكي براحتك .
: لا انا هحكي بس لما تاكلي معايا الاول علشان تفتحي نفسي .
: افتح نفسك علي الاكل ولا علي الكلام ؟؟
: الاتنين .
ضحكنا اوي احنا الاتنين وفعلا قعدت حنان وبدأت تاكل و بدأت احكي وانا باكل معاها ......
: اخلاص ، دي بنت خالتي اللي كنت بحبها من واحنا عيال صغيرين وكبرنا وكبر الحب بينا ، كانت احلي واجمل حاجة في حياتي وعشت معاها اجمل قصة حب في الدنيا ، كانت اقرب حد ليا في الدنيا كنت بحبها اكتر من نفسي .
: وليه مش اتجوزتوا ؟؟ ده انتوا حتي قرايب وده كان هيسهل كل حاجة .
: بيتهيألك ، بالعكس !! ابويا وابوها كانوا بيكرهوا بعض جدا من زمان و علشان كده كان مستحيل نتجوز .
: وانت حاولت تتقدم لها ولا محاولتش ؟
: حاولت وقولت لأبويا اني بحبها وعاوز اتجوزها ورفض ، وروحت اتقدمت لوحدي وجوز خالتي رفض وراح مجوزها لابن اخوه في نفس السنة .
: وهي كان رد فعلها ايه ؟
: حاولت ترفض لكن اسلوب الحياة في القرية عندنا كان اقوي منها واتجوزت غصب عنها ، وبالرغم من كده هي فضلت تحبني حتي بعد ما اتجوزت ابن عمها .
: وبعدين ؟
: بعد ما اتجوزت ابن عمها بشهر اتصلت بيا وقالتلي انها لسه بتحبني وانها مش طايقة تعيش مع ابن عمها .
: وبعدين ؟ فضلتوا تتكلموا بعد كده ؟
: لا ، لما اتصلت بيا و قالتلي كده قولتلها مادام بقيتي مراته وعلي ذمته بلاش تكلميني تاني علشان انا راجل حر واللي مش اقبله علي نفسي مش هقبله علي راجل تاني .
: قولتلها كده رغم انك بتحبها ؟؟ والراجل ده هو اللي اخدها منك !!!!!!
: ايوه طبعا . المسألة مسألة مبدأ .
: الصراحة تصرفك ده رغم انه مش رومانسي خالص لكنه كله رجولة وشهامة .
: شكرا الله يخليكي .
: انا بتكلم جد ، لو حد تاني مكانك مكنش عمل كده .
: انتي بتقولي موقفي ده مش رومانسي .
: الصراحة ايوه .
: وهو علشان ابقي رومانسي ارضي للانسانة اللي بحبها انها تخون جوزها علشاني ؟؟!!! مستحيل طبعا دي مسألة مبدأ .
: الصراحة انا مش عارفة اقولك ايه !! وبعدين ايه اللي حصل ؟
: من وقتها هي كملت مع جوزها ومعاها دلوقتي ٤ عيال منه .
: ماشاء الله ، ومش بتتقابلوا ابدا ؟؟
: بشوفها لكن نادرا لأنها عايشة في بلد تانية غير بلدنا .
: ولما بتشوفها بتتكلموا ؟
: ايوه ، بس الكلام العادي بتاع القرايب مش اكتر .
: ولسه بتحبها ؟
: اللي بيحب عمره ما يكره ، لكن انا مش بفكر فيها دلوقتي ابدا زي الاول .
: انا عاوزة اقولك انك كبرت في نظري اوي بعد ما حكيتلي حكايتك دي .
: وانتي ......
وفجأة الكهربا قطعت والنور انطفا !!
صرخت وقالت : انا خايفة اوي .
قولتلها : متخافيش انا هقوم اشوف الموبايل فين واشغل الكشاف .
قالتلي : لا خليك مكانك ارجوك .
قولتلها : متخافيش .
وقومت ادور علي الموبايل وبدون قصد خبطت فيها و .........
↚
وفجأة الكهربا قطعت والنور انطفا !!
حنان صرخت وقالت : انا خايفة اوي .
قولتلها : متخافيش انا هقوم اشوف الموبايل فين واشغل الكشاف .
قالتلي : لا خليك مكانك ارجوك .
قولتلها : متخافيش .
وقومت ادور علي الموبايل وبدون قصد خبطت فيها و انا ماشي فخافت جدا !!
قولتلها : مش قصدي .
قالتلي : ما انا قولتلك بلاش تقوم .
جبت الموبايل وشغلت الكشاف وفضلنا قاعدين نتكلم لكن الكهربا اتأخرت والموبايل قرب يفصل .
قالتلي : للاسف موبايلي كمان كان قرب يفصل شحن ، ده زمانه فصل .
: طيب وبعدين هنقعد في الضلمة !! انا هنزل اجيب شمع .
: لا لا لا متنزلش وتسيبني لوحدي هنا انا بخاف اوي من الضلمة .
: طيب تنزلي معايا ؟؟
: لا استني تقريبا في شمع جوه في المطبخ استني اروح اشوف .
: طيب اجي معاكي انورلك بالموبايل ؟؟
: لا ، خليك هنا متجيش ورايا .
ضحكت وقولتلها : حاضر .
قامت حنان تدخل المطبخ لكنها وقفت فجأة في نص الطريق وقالتلي : تعالي نور لي علشان اشوف بس بعد اذنك من بعيد ومتقربش .
ضحكت وقولتلها : حاضر .
وقفت بعيد وهي راحت جابت شمعتين كانوا في المطبخ .
ولعت الشمعتين وقالت : لما كانت الكهربا بتقطع في شقتي كنت علطول بجري علي عيالي واخدهم في حضني .
ضحكت و قولتلها : ارجوكي اعتبريني زي عيالك .
ضحكت وقالتلي : وبعدين بقي !! انا بتكلم جد .
: انتي مش كلمتيهم من البارح ؟؟
: لا ، انا كلمتهم الصبح وانت نايم .
: اكيد وحشوكي .
: اوي اوي مش بقدر ابعد عنهم اول مرة ابعد عنهم كده .
: بس علفكرة مش انا السبب .
: انا عارفة يا استاذ وائل ، علاء هو السبب الله يسامحه بقي .
: و علاء ؟
: ماله ؟
: اكيد بردو وحشك ؟
: ممكن احتفظ بالاجابة لنفسي ؟؟
: طبعا براحتك . دي حاجة خاصة وانا اسف لو اتدخلت فيها .
: لا مش قصدي ، الصراحة علاء الله يسامحه بقي هو اللي جمد قلبي ومشاعري من ناحيته .
: ازاي ؟
: انا كنت بحبه فعلا في الاول لكن كتر قسوته عليا خلي حبه في قلبي يقل اوي .
: انتوا عرفتوا بعض ازاي ؟
: علاء كان اخو صحبتي في المدرسة في ثانوي وكنت احيانا بروح اعدي عليها اصور ورق او مذكرات .
: وبعدين ؟
: علاء كان اخوها الكبير واعجب بيا وبدأ يحاول يكلمني اكتر من مرة .
: واتعرفتوا علي بعض بالطريقة دي ؟
: لا ، هو حاول يكلمني كتير لكن انا كنت بصده .
: يعني الاعجاب كان من طرفه هو بس ؟؟
: لأ هو اعجب بيا الاول وبعدها انا اعجبت بيه .
: و بدأتوا تتكلموا من هنا بقي ؟
: لأ هو حاول يكلمني كتير وانا كنت برفض لأني كنت بتكسف جدا . وبعدين بطلت اروح عندها ، بعدها لقيت صاحبتي بتقولي ان علاء اخوها عاوز يتكلم معايا علشان يتقدملي .
: وطبعا انتي وافقتي ؟
: لأ رفضت بردو وقولتلها لو عاوز يتكلم معايا يبقي في بيت اهلي .
: برافو عليكي .
: اتقدملي واتخطبنا واتجوزنا علطول في خلال سنة ونص . كنت لسه في سنة اولي في المعهد واتجوزنا في سنة تانية .
: وسبتي المعهد ؟
ضحكت اوي وقالتلي : لأ ، انت توقعاتك كلها غلط ، انا كملت المعهد واحنا متجوزين .
: انتوا متجوزين من كام سنة ؟
: من ٨ سنين تقريبا .
: وبعد الجواز حبيتي علاء ؟
: ايوه طبعا ، كنت بحبه اوي في اول الجواز وفضلت احبه فترة طويلة لكن قسوته اللي ظهرت بعد كده و يمين الطلاق اللي بيحلفه كتير وكان السبب في اللي احنا فيه دلوقتي ضيع الحب اللي بينا .
: لكن اللي اعرفه انك بتحبيه وعاوزه ترجعيله علشان بتحبيه .
: متنساش ان بينا ٣ عيال هما دول السبب اللي رابطني بيه وعلشانهم موافقة ارجعله ، انما قسوته عليا و انه يطلقني ٣ مرات غيرت قلبي من ناحيته لدرجة اني تقريبا بدأت اكرهه .
: طيب سوري بقي في سؤال اومال انتي رافضة ليه تتم الدخله ويكون جواز حقيقي ؟؟
: انا رافضة ده مش علشان علاء .
: اومال ليه ؟
: علشان انا جسمي غالي عندي وانا انكشفت علي راجل اللي هو علاء جوزي مش هينفع انكشف علي راجل تاني .
: قصدك علاء طليقك ؟
: ايوه ايوه .
: لكن اللي انتي رافضاه ده دلوقتي في الحلال مش في الحرام ؟؟!!
: انت عاوز ايه ؟
بصيت في عيونها واحنا بنتكلم كان شكلها حلو اوي زي القمر في ضوء الشموع !! وحسيت بانجذاب قوي ناحيتها .
قولتلها : الجو ده مش بيفكرك بحاجة ؟؟
: ااه يبقي اللي في دماغي صح ، طيب انا داخله انام بقي .
: هتنامي في الضلمة ؟؟
: ايوه .
: مش هتخافي ؟
: مش مهم ، الكهربا هتيجي دلوقتي مش هتتأخر اكتر من كده .
: يارب الكهربا ما تيجي للصبح .
: انت عاوز تضايقني ؟
: بالعكس .
: انت عاوز ايه يا وائل ؟
: عاوزك .
: انت بتقول ايه ؟!! انت اتجننت صح ؟؟
: ليه علشان عاوز حلالي .
قامت وقفت وقالت : بس ده مش اتفاقنا .
: انا من زمان معجب بيكي بس كنت مخبي اعجابي علشان كنتي متجوزة ، انما دلوقتي انتي حلالي وانا حلالك يبقي ايه اللي يمنعنا ؟!!!
: انا داخلة انام .
: استني .
مسكت ايديها و جذبتها ناحيتي ، لكنها سحبت ايديها بسرعة وجريت .
قومت جريت وراها ، دخلت اوضتها وحاولت تقفل الباب ، لكن انا وقفت ومنعتها !!!
قالتلي : وبعدين بقي ، مش هينفع اللي في دماغك !!
: انا مفيش في دماغي حاجة غلط ولا حرام .
: لا اللي في دماغك غلط .
: لا بالعكس ده هو الصح و الحلال ، احنا متجوزين علي سنة الله ورسوله واهلك كلهم عارفين اننا متجوزين وطليقك نفسه عارف اننا متجوزين .
: ايوه بس علاء عارف اننا متفقين انه يعني مش هيحصل حاجة بينا .
: حنان هو احنا هنضحك علي نفسنا !! معقول في راجل عارف ان ست حلوة زيك تكون مع راجل في شقة لوحدهم وكمان مكتوب كتابهم و مش هيحصل حاجة بينهم !!! مستحيل طبعا !!!
: بس انا بالنسبالي
قاطعتها وقولتلها : هتكدبي عليا ولا علي نفسك !!! انا شوفت في عيونك نظرة اعجاب واحنا بنتكلم .
: لا بيتهيألك .
: لا انا متأكد . افتحي الباب بقي ، مش عاوز ازوء الباب علشان خايف تقعي .
: زوء الباب لو عاوز ووقعني يا وائل .
: لا مش هقدر ، انتي اللي هتفتحي الباب .
: ريح نفسك مش هيحصل اللي في دماغك .
: انا بحبك يا حنان افتحي علشان خاطري .
: علشان خاطري انا روح دلوقتي يا وائل وهفكر في اللي انت بتقوله ده بكره .
: انتي ليه بتعملي كده ؟؟
: علشان جسمي غالي عندي .
: انتي ليه مش عاوزة تقتنعي اننا دلوقتي متجوزين فعلا يعني جسمك ده ملكي وانا ملكك .
: انا عارفه يا وائل بس ..
: من غير بس ..
ومسكت ايديها ودخلت الاوضة وهي
↚
ومسكت ايديها ودخلت الاوضة وهي فضلت تضربني في صدري علشان ابعد وترجع بضهرها لورا وتقولي بلاش وانا ماسك ايديها لحد ما وقعنا علي السرير .
كانت اسعد لحظات حياتي ، قومنا و كان النور رجع . دخلنا اخدنا شاور وخرجنا وقعدت جنبي وراسها علي كتفي و قالتلي وهي خايفة : علاء لو عرف هيدبحني !!
: انتي مراتي و محدش يقدر يلمسك وانا موجود .
: انت متعرفش يا وائل ده بيحبني بجنون !!
: وانا بعشقك . لو كان بيحبك مكنش فرط فيكي ٣ مرات .
: انت بتكدب عليا .
: ليه ؟
: هو انت لحقت تعرفني علشان تحبني وتعشقني كمان !!
: تصدقي اني كنت بحلم بيكي ؟؟
ضحكت وقالت : لا بقي انت كده كداب اوي .
: من ساعة ما سكنت جنبكم وانا بحلم بيكي .
: علي افتراض اني هصدقك ، كنت بتحلم بيا ليه ؟ فيا ايه انا عن غيري !!
: انتي كل حاجة فيكي عجباني من اول ما شوفتك . اولا انتي حتة عسلية وزي القمر كل حاجة فيكي حلوة ، كنت بحب اشوف ابتسامتك وانتي بتضحكي حتي ولو من بعيد ، غير رقتك وشياكتك و غير كده اسلوبك مع علاء واولادك وكمان احترامك لنفسك ولجوزك في لبسك ومشيك ، بصراحة انتي نموذج لفتاة احلام اي شاب .
: لا انت كده بتبالغ اوي .
: صدقيني مش ببالغ دي الحقيقة او علي الاقل ده احساسي ورأيي فيكي .
: يعني انت كنت بتحبني من زمان ؟؟
: لو قولتلك كنت بحبك من زمان ابقي بكدب عليكي ، انا كنت عارف انك متجوزة وعندك اولاد ، انما كنت معجب بيكي و بحلم بيكي او اني اتجوز واحدة شبهك .
: طيب وبعدين هنعمل ايه دلوقتي ؟
: هنعمل زي اي اتنين عرسان متجوزين .
: لا لا مش قصدي كده ، انا اقصد هنعمل ايه مع علاء ؟
: سيبك من علاء ومن اي حد دلوقتي خليكي هنا مع عريسك .
: نعم يا عريسي عاوز ايه ؟
: تعالي ندخل جوه وانا اقولك .
: طيب استني ناكل الاول .
: لا هناكل بس بعدين ، تعالي .....
وبعد ما اخدنا شاور حنان بصيت في الساعة كانت حوالي ٣ الفجر !! قالتلي : مش كنت بتقول عندك شغل بكره ، يلا نام بقي علشان تروح شغلك الصبح .
: لا يا حبيبتي ، مش رايح ، انا قاعد مع القمر مش هسيبه ، حضرلنا حاجة ناكلها .
حنان جابت الاكل وقعدنا ، مسكت ايديها و قولتلها : ايديكي الحلوة دي خليها علي قلبي وشوفي بيدق ازاي وانا هأكلك بايدي .
وبدأت أأكلها بايديا واهزر معاها .وهي بتضحك وكانت سعيدة جدا !!
وفضلنا سهرانيين مع بعض لبعد طلوع الصبح بفترة .
كنا تعبنا من السهر فاخدتها في حضني علشان ننام لقيتها بتقولي : انت طلعتلي منين ؟
: طلعتلك من الفانوس .
وقعدنا نضحك ، قالتلي : انا مكنتش اتوقع ابدا ان انت كده ؟
: يعني ايه ؟
: انت بجد رومانسي اوي .
: وانتي كمان تجنني .
: انا حاسة اني مكنتش عايشة قبل كده .
ضحكت اوي وقولتلها : لا بقي انتي كده اللي بتكدبي .
: لا انا بتكلم بجد انا كنت فاكرة نفسي اني كنت بحب لكن لأ ، انا حسيت معاك في يوم واحد احاسيس عمري ما حاستها في حياتي .
: عارفة ليه ؟ علشان انا حبيتك فعلا ، ومعاكي بقلبي وروحي و احساسي . وغمضنا عينينا ونمنا .
صحينا بعد الضهر لقيت علاء كان اتصل بيا كتير .
فطرنا وقعدنا نتكلم وبعد شوية علاء اتصل تاني ، ولما رديت عليه قالي : اتصلت بيك كتير يا وائل مردتش ليه ؟
: معلش يا علاء كنت شغال .
: انت روحت الشغل ؟
: ايوه طبعا وهقعد ليه ؟
: طيب انت لسه عند اتفاقنا ولا حصل حاجة ؟
: لأ محصلش حاجة اطمن ، هي قاعدة في اوضة وقافلة علي نفسها علطول .
: هتطلقها امتي ؟
: احنا لسه متجوزين من يومين يا علاء .
: لسه مش اتخانقتوا مع بعض لحد دلوقتي ؟
: وهنتخانق ازاي وهي قاعدة لوحدها وقافلة علي نفسها ؟!!
: طيب خلي بالك ان عيالها بعيد عنها وقاعدين عند جدتهم ، حاول تطلقها علطول .
: ربنا يسهل .
وبعد ما قفلت معاه لقيت حنان قاعدة سرحانة !!
قولتلها : مالك سرحانة في ايه ؟
: لا ابدا بس العيال وحشوني اوي .
: طيب ما تتصلي تطمني عليهم .
: حاضر هتصل بيهم دلوقتي ، بس قولي انت هتطلقني امتي ؟؟
: انت خلاص زهقتي مني ؟؟
: انا !!! بالعكس .
: طيب مستعجلة ليه علي الطلاق ؟
: مش هو ده الاتفاق ؟! ولا انت غيرت رأيك ؟
: انا عن نفسي مش عاوز ابعد عنك لحظة .
: ايوه بس اكيد هتنفذ اتفاقك .
: لو انتي عاوزة تكملي معايا يبقي مفيش قوة علي الارض هتاخدك مني .
: بتتكلم بجد ؟؟
: اكيد ، جربي وانتي تشوفي .
: ياريت . بس علاء مش هيسكت !!
: مش مهم اللي نفسه فيه يعمله وانا لو هحارب الدنيا كلها مش
↚
: ياريت . بس علاء مش هيسكت !!
: مش مهم اللي نفسه فيه يعمله وانا لو هحارب الدنيا كلها مش هسيبك .
: بتتكلم جد ؟
: اكيد طبعا .
: والعيال هعمل فيهم ايه ؟؟
: انتي ليه بتدوري علي حاجة تضايقنا !! خلينا دلوقتي مع بعض ومتفكريش في حاجة تضايقنا .
: حاضر بس العيال وحشوني اوي .
: اتصلي يلا علشان تطمني عليهم .
اتصلت حنان باولادها وكلمتهم و بمجرد ما خلصت المكالمة نزلت دموعها ، اخدتها في حضني وحسيت بحزنها علي بعاد اولادها عنها ، مسحت دموعها من علي خدودها وهي بتقولي : وحشوني اوي مش عارفة اعمل ايه !!
قولتلها : معلش ربنا ما يبعدك عنهم ابدا ،. كلها ايام وهتبقي معاهم .
: هتطلقني يا وائل ؟
: انا اهم حاجة عندي راحتك وسعادتك ، انا لو عليا مش عاوز ابعد عنك ابدا .
: ولا انا بس مش عارفة اعمل ايه !!!
: قولتلك سيبيها للظروف وان شاء الله ربنا يعمل ما فيه الخير .
وبعدين قولتلها ايه رأيك نلعب شوية ؟
ضحكت ولسه الدموع في عينيها : هنلعب ايه ؟ هو احنا لسه عيال !!!
:وهما العيال بس اللي ليهم حق يلعبوا !!!
وقعدنا نلعب ونهزر مع بعض وخلتها تضحك من قلبها وتنسي حزنها .
وبعدين قالتلي : انت بجد مش معقول !!!
: ازاي ؟
: خلتني اضحك والعب في عز ما كنت حزينة .
: علشان بحب اشوف ابتسامة عيونك علطول و مش عاوز ابدا اشوفها حزينة .
: انا نفسي اسعدك زي ما انت بتسعدني .
: ومين قالك ان انا مش مبسوط وسعيد ؟؟
: عاوزة اسعدك اكتر علشان متنساش الايام دي ابدا .
: لو انتي هتنسيها يبقي انا ممكن انساها .
: انا عمري ما اقدر انسي حبك وحنيتك عليا واهتمامك بيا ابدا . قولي بقي علي اي حاجة نفسك فيها ؟؟
: نفسي تبقي معايا علطول ، عارفة يا حنان اللي اتولد في قلبي في ايام حب كأنه حب سنين .
: وانا كمان .
وفضلنا مع بعض كذا يوم مش بخرج من البيت ابدا وقاعدين مع بعض علطول نضحك ونلعب زي ما يكون كل حد فينا لقي نصه التاني اللي كان بيدور عليه !!
قالتلي انا هنزل اشتري حاجة من تحت ولما حاولت اعرف مش رضيت تقولي !!! بعدها اتفاجئت انها اشترت كام بيبي دول اشكال والوان مختلفة !!!
كانت تسيبني قاعد لوحدي وتختفي ، الاقيها دخلت اوضة النوم وقفلت علي نفسها وتتأخر ولما كانت تخرج اشوف قدامي ملكة جمال بمعني الكلمة .
كانت بتتفنن في الميكاب علشان تعجبني وترضيني ، حقيقي كانت عاوزة تسعدني بأي طريقة فعلا .
ومهما اقولها انها اجمل ست في الدنيا كانت بتحاول تعجبني اكتر .
عدا اكتر من اسبوع واحنا مع بعض وكل يوم علاء يتصل بيا وانا اطمنه بأي كلام مختصر واقفل معاه .
كنت بصحي من النوم ساعات علي بوسها ليا وانا نايم .واحيانا كتت بحس بيها تمسك ايدي وتبوسها وكنت بعمل نفسي اني نايم ومش حاسس .
ولما كانت بتنام قبلي كنت اقعد ابصلها واشوف قد ايه هي جميلة اوي وكيوت وهي نايمة ، كنت بحس انها ملاك ، معرفش ازاي رجل يبقي معاه الملاك دي ويطلقها !! اكيد علاء ده مش يستحق يعيش مع ملاك زيها او انه مجنون ومش عارف قيمة النعمة اللي في ايديه .
لحد ما في يوم لقيت علاء بيرن علي جرس الباب !!!
حنان اول ما عرفت خافت اوي ، قولتلها : مفيش احسن من المواجهة انا هفتح واقوله اننا مش هنطلق .
قالتلي : وانت فعلا مش ناوي تطلقني ؟
: ايوه .
: طيب بلاش المواجهة تبقي هنا ، انا هرد عليه من ورا الباب واقوله انك مسافر ومش هقدر افتح الباب .
وفعلا ردت حنان علي علاء وقالتله : وائل مش هنا ، مسافر في شغل .
قالها : طيب افتحي الباب .
: لا مش هينفع .
: ليه ؟؟ افتحي يا حنان .
: مينفعش انت ناسي اني علي ذمة راجل تاني !!
: طيب افتحي نتكلم كلمتين وامشي علطول .
: وانت ترضاها علي نفسك ؟!!
: ده مش جوزك بجد ، ما انتي فاهمة الموضوع !!
: بردو مينفعش .هو دلوقتي جوزي قدام ربنا .
: انتوا حصل بينكم حاجة ؟؟
: انت بتقول ايه !! وطي صوتك ، ايه الفضايح دي !!
: طيب قولي ايوه او لأ وانا همشي علطول ؟
: لأ ، امشي بقي .
: انا هتصل بيكي نكمل كلامنا .
: لأ متتصلش علشان مش هرد عليك .
: ليه ؟
: لما اطلق منه نتكلم انما دلوقتي مينفعش ابدا . انزل بقي من فضلك علشان محدش من الجيران يسمع .
نزل علاء لقيت حنان بتقولي : انت فعلا مش هتطلقني ؟
: لأ ، هطلقك في حالة واحدة بس ، لو انتي اللي تطلبيها مني .
: لولا العيال كنت مستحيل افكر ابعد عنك و اضيعك من ايدي ابدا .
: يعني انتي عاوزة ترجعيله تاني ؟؟!!
: لو عن نفسي لأ خلاص اللي بيني وبينه انتهي انما العيال هعمل فيهم ايه ؟؟
: بصي يا حنان عيالك انا هعتبرهم عيالي ونكمل مع بعض ومش هطلقك .
: مش عاوزة عيالي يعيشوا تجربة زوج الام .
: انا مش هبقي جوز امهم انا هبقي ابوهم واحن منه عليهم كمان .
: انا عارفة يا وائل بس انت لسه مش عرفت عيالي ولا عرفت شقاوتهم ، ومهما كنت حنين عليهم معلش يعني صعب تبقي زي ابوهم .
: هبقي احسن من ابوهم .
: خلي بالك لما العيال يبقي معايا مش هتبقي واخد راحتك معايا كده وانا كمان مش هبقي فضيالك زي دلوقتي .
: مش مهم ، اهم حاجة تبقي جنبي .
: عارف يا وائل ده حلم جميل عشناه واجمل ايام حياتي فعلا هي اللي بعيشها معاك .
: مش هقدر اشوفك وتبقي بعيدة عني خصوصا لما ترجعيله .
: وانا كمان مش متخيلة ان واحدة تانية تبقي مراتك .
: انا حاسس من كلامك انك قررتي خلاص انك ترجعي لعلاء ؟؟
: علي رأيك زي ما بتقول بلاش نضايق نفسنا واللي فيه الخير يقدمه ربنا .
: لو انتي بتقول ان ده حلم
↚
: انا حاسس من كلامك انك قررتي خلاص انك ترجعي لعلاء ؟؟
: علي رأيك زي ما بتقول بلاش نضايق نفسنا واللي فيه الخير يقدمه ربنا .
: لو انتي بتقول ان ده حلم انا مش عاوز اصحي منه ابدا .
: ولا انا كمان .
: ايه رأيك نسافر يومين نتفسح ؟
: لأ بلاش .
: ليه ؟
: عاوزة افضل معاك هنا اطول فترة ممكنة ، علشان كل ركن في الشقة يكون لينا فيه ذكري مع بعض .
: بحبك .
: بعشقك .
: هقولك زي ما قولتيلي (هو انتي لحقتي تعرفيني علشان تعشقيني ) ؟
: احنا مع بعض من ١١ يوم ولكن بحبك كأني اعرفك من ١١ سنة . انا مش شوفت حد رومانسي وحنين عليا زيك ابدا .
: انا مش هسيبك .
: بتتكلم بجد ؟؟؟
: ايوه خلاص ده قراري انتي هتفضلي مراتي ومستحيل اخليكي ترجعي له تاني .
: يا ريت ، بس اولادي ؟؟
: متشليش هم الولاد .
: طيب و هتعمل ايه مع علاء ؟
: انا هواجهه ونخلص من الموضوع ده .
: طيب اجل المواجهة شوية .
: طيب موافق نأجلها علي اساس اني مسافر تبع الشغل زي ما قولتيله .
:اه شهرين او تلاته عاوزة اشبع منك .
: لكن انا عمري ما هشبع منك ابدا .
علاء كان هيتجنن وحاول اكتر من مرة يتصل بحنان لكنها كانت مش بترد عليه .
و اتصل بوائل لكن وائل قاله انه مسافر في شغل . ولما سأله هيرجع امتي قاله لسه مش عارف .
علاء كان هيتجنن و اتصل بوفاء اختها : ازيك يا وفاء عاملة ايه ؟
وفاء : تمام الحمد لله .
: اختك بتصل بيها ومش بترد عليا !!
: يمكن مش سمعت الفون .
: لأ انا اتصلت كتير ، وانا روحتلهم الشقة ومش فتحتلي وكلمتني من ورا الباب وقالتلي ان وائل مسافر ومش هينفع تفتحلي وقالتلي متتصلش بيا علشان مش هرد لأنها علي ذمة رجل تاني !!
: طيب ما هي عندها حق يا علاء . اي واحدة محترمة لازم تعمل كده .
: انا عاوزك تروحيلها وتفهمي منها اذا كان حصل بينهم حاجة ولا لأ ؟
: انا كلمتها مرتين وقالتلي ان محصلش بينهم حاجة .
: معلش روحيلها وافهمي منها اكتر . وشوفيها هتطلق منه امتي ؟
: طيب يا علاء هروحلها ولما ارجع هرد عليك .
انا و حنان كنا قاعدين ومبسوطين وفجأة جرس الباب رن !!
حنان لما شافت اختها علي الباب قامت دخلت جري ولبست هدومها بسرعة وفتحتلها .
حنان : اهلا يا فوفا تعالي اتفضلي .
وفاء : أتأخرتي ليه يا نونا دا انا برن علي الباب من بدري ؟!!
كنت في الاوضة جوة وصوت التليفزيون عالي .
: اومال هو فين ؟
: مسافر .
: لا يا نونا متكدبيش العريس هنا .
: مين قالك ؟!
ضحكت وفاء : باين علي وشك يا نونا .
: باين ايه يا بت انتي ؟
ضحكت وفاء : باين اني جيت في وقت مش مناسب .
: دي جوازة صوري كده بس وبعدين يا فوفا انتي سألتيني قبل كده وقولتلك محصلش حاجة .
: اه قولتي بس دي مش الحقيقة . بلاش تكدبي باين يا بنتي عليكي . عيب عليكي يا نونا دا انا اختك حبيبتك . فين بقي العريس علشان اسلم عليه ؟
: قولتلك يا بنتي مسافر .
ضحكت وفاء : بطلي كدب يا نونا ، صحيح ابقي بصي في المرايا شوفي ايه اللي في رقبتك ده !!( وضحكت اوي ) . تعالي بقي جوه احكيلي ايه اللي حصل .
دخلت وفاء مع حنان اوضة النوم وقعدوا يتكلموا وانا حب الفضول عندي خلاني روحت اسمعهم ..
: احكيلي بقي يا نونا ايه اللي حصل .
: انا زي ما قولتلك كنت ناوية ميحصلش حاجة لحد ما نطلق لكن بعد كلامك ليا ولما شجعتيني وقولتيلي انه حلال ولما شوفت معاملته معايا واخلاقه بدأت الفكرة في دماغي لكن كنت برفضها ، ولما النور قطع وهو حاول معايا قاومته شوية لكن ضعفت .
: هو النور قطع كمان !! طيب احكيلي بقي .
: احكيلك ايه يا بنتي ما انا حكيتلك اهو .
: لأ ، احكيلي كل حاجة بالتفصيل .
: .................................. وطلع رومانسي وحنين اوي .
: يخربيته !! ده مش باين عليه كده خالص .
: ازاي ؟
: كنت فاكراه واخد الحياة جد وغلبان كده في نفسه .
: انا كمان كنت فاكره كده في الاول .
: ده علاء لو عرف هتبقي وقعه سودا !!
: ما انا عارفه وخايفة .
ضحكت وفاء : طيب مبروك يا عروسة . هتطلقوا امتي بقي ؟؟
: مش عارفة . بلاش تفكريني بالطلاق .
: ليه ؟!
: بصراحة نفسي افضل مع وائل ومطلقش منه ابدا .
: بتتكلمي جد ؟؟!!!
: انا بقول نفسي ، لكن انا عارفة انه مش هيحصل .
: وهو عاوز يكمل معاكي ؟؟
: ايوه ده حبني اوي .
: وانتي بصراحة تتحبي يا نونا ، مين ميحبش حتة قمراية كده عسوله زيك !!
: بس مش هينفع لازم نطلق .
: وليه مش هينفع !! مادام كويس معاكي وابن حلال وارتحتي معاه كملوا مع بعض . ولا عاملين حساب علاء ؟؟
: مع ناحية علاء مش هيسكت وهتحصل مشاكل كتير الله اعلم هتوصل لأيه !! ، لكن الاهم من علاء العيال هعمل فيهم ايه ؟؟
: لو هو بيحبك بجد وعاوزك هيقبل العيال يعيشوا معاكم .
: صعب اوي يا فوفا دول ٣ عيال ، وانا كمان مش عاوزاهم يعيشوا تجربة جوز الام .
: مش عارفة اقولك ايه يا حنان ، بيتهيألي لازم تفكري كويس .
: انا بحلم بس اني اكمل مع وائل لكن انا عارفة ومتأكدة انه مش هيحصل .
: شكلك حبتيه يا بت بجد .
: ايوه حبيته اوي .
: خلي بالك علاء هيخرب الدنيا . ده هو لما كان هنا ومش رضيتي تفتحيله و قولتيله ان وائل مسافر مش صدقك وشاكك كمان ان حصل بينكم حاجة !!
: طيب وبعدين انا خايفة اوي .
هنا انا خبطت علي الباب ، سمعت صوت ضحكة وفاء وبتقول (جوزك اهو رجع من السفر ) وقعدت تضحك اوي .
قامت حنان وفتحت الباب دخلت علطول وقولتلها : انا مش عاوز اسمع منك كلمة خايفة دي تاني ، وموضوع علاء خلاص انا هكلمه وهواجهه !!
وفاء قامت وقفت وسلمت عليا وقالتلي : طيب اهدي كده يا عريس ، انت مالك نرفوز كده ليه !!
سلمت عليها وقولتلها : سوري اني اتكلمت بنرفزة بس كلمة انها خايفة ضايقتني اوي .
وفاء : الف مبروك يا عريس .
: الله يبارك فيكي .
: حنان بتقولي انك بتحبها ؟
: حنان دي روحي .
: انت لحقت تحبها بالشكل ده ؟ ده انتو لسه عارفين بعض من ايام !!
: اللقا ده نصيب والحب قدر ، ويمكن النصيب هو اللي جمعنا ببعض في الظروف دي علشان نتقابل .
: خلي بالك علاء مش هيسكت انت متعرفش بيحبها ازاي ده مجنون !!
: لو كان بيحبها مكنش فرط فيها بدل المرة الواحدة ٣ مرات ، اما بقي بالنسبة انه مجنون والكلام ده ميهمنيش من الكلام ده وانا عارف هتصرف معاه ازاي .
: طيب وعيالها هي مش هتقدر تبعد عنهم ؟
: ولاد حنان دول ولادي وانا هقدر اخليهم يحبوني ويعيشوا معانا ، وانا قولتلها كده .
: انت شكلك بتحبها بجد .
: فوق ما تتخيلي .
: ربنا يوفقكم بس قبل ما تتكلم مع علاء وتواجهه فكروا كويس واوصلوا لقرار مفيش منه رجوع علشان متخربش بيتها وبعدين تسيبها ، المفروض انها كانت هترجع لعلاء والعيال ، لكن بعد ما يعرف اللي حصل مش هيرجعها تاني ولو رجعها هيذلها !!
: طيب انا هكلم علاء دلوقتي علشان نخلص من الموضوع ده .
حنان : لأ استني شوية يا وائل بلاش تسرع .
: لأ انا هكلمه دلوقتي .
و طلعت الموبايل واتصلت بعلاء وقولتله : انا عاوز اقابلك النهارده .
↚
: طيب انا هكلم علاء دلوقتي علشان نخلص من الموضوع ده .
حنان : لأ استني شوية يا وائل بلاش تسرع .
: لأ انا هكلمه دلوقتي .
و طلعت الموبايل واتصلت بعلاء وقولتله : انا عاوز اقابلك النهارده.
علاء : انت رجعت من السفر ؟
: ايوه .
: طيب اجيب المأذون واجيلك بالليل ؟
: لأ ، هنتقابل الاول نتكلم مع بعض .
: هنتكلم في ايه ؟ ما الموضوع خلصان .
: لما نتقابل نتكلم احسن .
ونزلت وروحت قعدت مع علاء علي القهوة وسألني : انت هتطلق حنان امتي ؟
قولتله : مش هطلقها .
: نعم !!! انت اكيد بتهزر .
: لأ مش بهزر انا بتكلم جد .
: وهو ده كان اتفاقنا ؟
: اذا كانت هي مش عاوزة ترجعلك يبقي هطلقها ليه ؟!
: ومين قالك انها مش عاوزة ترجعلي ؟
: هي نفسها .
: انت خالفت اتفاقنا يا وائل ودخلت عليها ؟؟؟
: شئ ميخصكش يا علاء ، هي مجرد طليقتك انما دلوقتي هي مراتي .
: تبقي خالفت اتفاقنا يا ابن .......
وقومنا مسكنا في بعض وضربنا بعض واتلم علينا الناس وسلكونا من بعض وهو بيتوعدني انه مش هيسيبني ولا هيسيبها !!
رجعت البيت ورنيت الجرس كتير لكن حنان مش فتحت الباب !!
حاولت اتصل بيها كان تليفونها مقفول !!
روحت عند بيت ابوها وامها وسألت عليها كانت مش موجودة هناك !!
سألوني ايه اللي حصل ؟؟
قولتلهم ان انا وحنان اتفقنا اننا مش هنطلق وهنكمل مع بعض !!
ابو حنان قال ان علاء مش هيسكت وأنه اكيد هيفكر يأذيها ويأذيني .
مامت حنان بكيت وقال انها خايفة يكون علاء عمل فيها حاجة او أذاها .
ابو حنان اتصل علي اخواتها واحدة واحدة واخيرا عرفنا انها راحت عند وفاء اختها .
نزلت انا وابوها وامها وروحنا عند وفاء و اول ما دخلنا هناك سألت حنان : انتي مشيتي ليه من البيت وقافلة الموبايل ؟؟
حنان : قولي الاول انت كلمت علاء ؟؟
: ايوه .
: وعمل ايه ؟
: زعل واتخانق معايا بس ميهمكيش منه مش هيقدر يعمل حاجة اكتر من كده . هو عمل كده من الصدمة .
: بيتهيألك ، ما انا قفلت الموبايل ومشيت من الشقة علشان عارفة ان ده هيحصل .
: انتي خايفة ليه كده ؟؟ هو انتي مش متجوزة راجل !!
: يا وائل انت راجل وسيد الرجالة بس مش بلطجي وكمان انا عاوزة اعيش في هدوء و مش عاوزة مشاكل .
: وتفتكري ان ده الحل انك تسيبي الشقة وتيجي هنا ؟
: يعني ينفع يا وائل اننا نعيش في شقته بعد اللي حصل ؟!!
: لأ طبعا عندك حق . انا كنت ناسي انها شقته ، طيب انتي هتقعدي عند مامتك و انا هشوف شقة في خلال يومين تلاته نعيش فيها .
: مش هينفع اروح عند ماما لأنه اكيد هيروح هناك .انما مش هيقدر ييجي هنا عند وفاء .
: طيب اللي تشوفيه يا حنان ، وانا اول ما الاقي شقة هقولك علشان ننقل ونعيش فيها .
: والعيال يا وائل هنعمل فيهم ايه ؟ انا مكنتش عاوزاك تتسرع كده وتكلمه الا لما تفكر كويس الاول .
ردت وفاء اختها : روح يا وائل دور علي شقة بس تكون جنبنا هنا علشان انا عندي فكرة هتعجبكم ما دام انتوا الاتنين متمسكين ببعض بالشكل ده .
حنان : فكرة ايه يا وفاء ؟؟
وفاء : هبقي اقولك عليها بعدين .
نزلت من عند وفاء وروحت لسمسار شقق وفعلا تاني يوم كنت أستأجرت شقة علشان نعيش فيها .
ولما روحت لحنان عند اختها وفاء علشان اعرفها اني اخدت شقة جديدة .
حنان قالتلي ان علاء راح لأبوها وقاله علي اللي حصل وبعد ما اتكلم مع بابا اكتر من ساعتين قاله انه ممكن يسكت ومش هيتعرض لنا في حالة واحدة لو ان حنان قالتله بنفسها انها مش عاوزة ترجعله تاني !!
قولتلها : خلاص اتصلي بيه وقوليله دلوقتي خلينا نخلص .
حنان قالتلي : لأ ده عاوزني اقوله كده في وشه !!
قولتلها : وانتي عندك مشكلة في كده ؟؟
: ايوه خايفة .
: متخافيش انا هبقي جنبك .
: ما انا هخاف عليك بردو .
: كلنا هنكون جنبك .
وفعلا اتقابلنا كلنا في شقة وفاء وكان ابوها وامها واخواتها كلهم موجودين ولما وصل علاء وقفت حنان ورايا خايفة منه .
علاء : حقيقي يا حنان انتي مش عاوزة ترجعيلي تاني ؟؟
حنان : انت اللي طلقتني بدل المرة الواحدة ٣ مرات .
علاء : وانا حسيت بغلطتي و جوزتك لده علشان عاوز اصلحها .
حنان : بعد ايه ؟! وبعد كل اللي عملناه ده لو رجعتلك تاني هتطلقني تاني ، دي حاجة انا متأكدة منها .
علاء : لأ مش هيحصل دي كانت غلطة عمري وندمت عليها ومش ممكن اكررها تاني ابدا .
حنان : الكلام ده مش حقيقي ومش هيحصل .موضوعنا انتهي .
علاء : طيب خليها اخر فرصة .
حنان : اديلك فرصة ازاي؟!! انت عارف اللي سقطتك من نظري اكتر انك كنت عارف اللي هيحصل مع وائل وقبلت !!!
علاء : لأ انا كنت متفق معاه انه مش هيلمسك لكن هو اللي غدر و ..
حنان : متكملش علشان انت كداب ، انت عارف ان مستحيل راجل طبيعي هيكون معاه ست جميلة وفي شقة لوحدهم و مراته ويقعد معاها بدون ما يلمسها !!! بس انت كنت بتتفق معاه علشان تجمل موقفك قدامنا وقدام نفسك مش اكتر .
علاء : طيب لو مش علشاني يا حنان ارجعي علشان ولادنا .
حنان : عيالي انا هعرف اربيهم كويس .
علاء : طيب خلاص ، بس الولاد هيفضلوا معايا مادام رضيتي براجل تاني .
حنان : عيالي انا مش هسيبهم ابدا .
علاء : ولا انا عمري ما هسيبهم يتربوا مع جوز امهم .
هنا دخلت وفاء في الكلام وقالت : ولادكم هيعيشوا معايا انا ، انتو عارفين انا وجوزي ربنا رزقنا بحاجات تانية حلوة كتير لكن مش رزقنا بالعيال . يا ريت تدونا الفرصة نساعدكم في تربيتهم ويعيشوا معانا وانا هبقي فاضية اذاكرلهم واهتم بيهم . ولما علاء يحب يشوفهم ييجي في اي وقت يشوف اولاده وكمان حنان شقتها الجديدة جنبي هنا في نفس الشارع لو عاوزة تشوفهم في اي وقت هيبقي سهل عليها سواء تجيلهم او يرحولها .
علاء رفض في الاول لكن بعد كده وافق ، وفعلا كانت فكرة وفاء انها تربي ولاد حنان عندها وان شقتنا تكون قريبة منها علشان حنان تشوف عيالها في اي وقت و مش تحس انهم بعدوا عنها كانت فكرة جميلة جدا وافقنا عليها كلنا .وانتقلت انا وحنان لشقتنا الجديدة علشان نكمل شهر العسل .
انتهت .
