عتبات العشق .... سوسن رمضان

 عتبات العشق ....  سوسن رمضان

------------------

ماتيجي نطلع للسما .. 

مش قصدي موت 

يا حبيبي لااااا ..

انا عاوزة ازور وياك النور 

واملس علي عتبات العشق

سِلمة سِلمة

وارقص واغني ف كل سما 

علشان مغرمة 

وادوق أفراح الروح ..واروح 

وابقي متيمة ..

وادردش حبة مع الأشواق 

يمكن تشتاق للهدنة شوية مع التوهه 

او حتي تبطل تقتلنا .. مع كل فراق ..

طب عارف ..

انا ممكن ادوب واتحول بين احضانك توب 

وورود وفراش ياخدك ويطير 

عارف ايه كمان ..

انا ممكن اكون ف عنيك 

إحسان وحنان وأمان 

سكنك ومحل ميلادك ..

وطنك ومعادك .. والعنوان ..

واكون كلمات بتضوي بنور زي النجمات 

وكشاعر ترسمني قصيدة بلون السماوات ..

انا نفسي اكون أنفاس تحييك 

وبخور يرقيك .. احلام ترضيك ..

ايام تهديك أحضان وبيوت ..

انا نفسي حقيقي اموت ..

بس اموت فيك ....

سوسن رمضان