امبارح قعدت بتفرج علي فيديوهات لسمير غانم كل مرة كنت بقف قدام كلامه عن بناته، وقد إيه هو بيحبهم.
تشوفه وهو بيتكلم عنهم تحس إنه بيتحول إنسان تاني، بينسي قدام الشاشة إنه ممثل كبير ومهم وكوميديان مفيش زيه.. وبيفتكر بس إنه أبو البنات، رزقه من الدُنيا.
قابلني لقاء له مع وفاء الكيلاني في برنامج السيرة وهو بيتكلم عن دُنيا، وصفها إنها princess جت شقلبت كل كيانه وحياته واتغير أول ما اتولدت، وإيمي "أمئومي" حبيبته، اللي وصفها إنها شاربة خفة دمه في كل قعدة بتضحكه..
حتي اختيار اسامي البنتين كان له معني في حياة سمير غانم اتكلمت عنه دلال عبد العزيز مع مني الشاذلي.. ان دُنيا مش مجرد دُنيا، هي عملت جملة اسمها "دُنيا سمير غانم" في إشارة إنها حياة سمير غانم الجديدة، وإيمي اسمها الحقيقي أمل.. الامل اللي عايش علشانه وبيشوف فيهم حياته الحلوة.
حتي في كل مسلسلات دُنيا وايمي كان سمير ودلال بيشاركوا حتي لو بمشهد بسيط، ظهورهم علي الشاشة هما عارفين إنه هيخطف منهم الكاميرا بس كانوا حابين دة، ومتشرفين بيه.
قريت موقف امبارح لواحدة بتحكي إنها قابلته في المطار وقالتله انها بتحبه أوي.. قالها امال لما تشوفي دُنيا بنتي، عاملة شغل حلو اوي اتفرجي عليه.. هو في كدة بجد؟
كانوا بيخافوا يطلعوا في أي لقاء، وكانوا نادرًا لما تشوفهم في برنامج علشان بيخافوا يغلطوا، بيخافوا يضيعوا تعب أبوهم، وكانوا عايشين دايمًا حاطين اسمه في المقام الاول وقدام عينيهم.. حتي دنيا قالت: انا لو غلطت مش هيقولوا دنيا غلطت، حيقولوا بنت سمير غانم غلطت.
لا عمرنا سمعنا عنهم مشكلة، ولا حد زعل منهم.. تربية سمير ودلال فعلاً.
وفي اللحظة الاجمل؛ هو في أجمل من إنك تستلم جايزة تكريمك في مهرجان بلدك من بناتك؟ وتشوف في عينهم الفخر والفرحة في عين حبيبتك وشريكة عُمرك؟
سمير غانم كان أب وزوج جميل قبل ما يكون فنان مش هيتعوض، سايب سيرة حلوة وحالة حُب ملهوش حدود في قلوب كل الناس وبناته ودلال هيعيشوا مبسوطين بيها.. ربنا يصبرهم.
