عـٰٓشَٰـُـٰٓآقَٰـُـٰٓ آلَٰـُـٰٓرﯛ̲୭آيَٰـُـٰٓآتَٰـُـٰٓ:
#فتاة_أحلامي
#يا_شيييييييييخة
بقلم .. كيمو 🍟
♤1♤
◇معظمنا كشباب حياتنا كلها بقت على السوشيال ميديا .. التلفون بقى حاجة اساسية بالنسبة لينا .. الواحد فينا م بقدر يبعد من تلفونو اكتر من ساعة .. م بنقدر نقعد بدون نت .. الفيس و الواتس و الانستا و التويتر و غيرهم اصبحو حياة بالنسبة لينا ..◇
◇و السوشيال ميديا دي نحنا كشباب مستهلكنا بطريقه م طبيعية و كتير مننا بستعملها بالطريقة الغلط .. دا غير الناس المستخدماها بطريقة حرام عن طريق نشر صور او فيديوهات خادشة و فاضحة بس عشان يكسبو متابعين او غيرو .. مع انو في ناس كتيرة بتستخدمها بطريقه عادية و بدون نشر اي شي م صح ممكن يجيب ليهم سيئات بي طريقه ساذجة ذي دي ..◇
◇اذا اتكلمنا عن استخدامات الناس للسوشيال ميديا الكلام ح يكون كتير و الاستخدامات كتيرة .. سواء كان من الشباب او الكبار او حتى الصغار الدخلو العالم دا بي طريقه سريعة و مخيفة في نفس الوقت .. في النهاية نحنا ممكن نستعمل السوشيال ميديا دي بطريقه عادية و م تأثر على حياتنا و م نخليها حاجه اساسية لازم نصبح بيها و ننوم بيها و تبعدنا عن حياتنا الواقعيه و ناسنا الواقعين ال هم افضل بكثييييير من الناس "الوهمين" الورة الشاشات ..◇
*من البداية كدة ح نحكي عن بت اسمها ريان .. ريان 16 سنه و ممتحنة تالت السنة دي و ساكنة الخرطوم بالظبط كدة في اركويت و عندها اخوها اكبر منها 22 سنه اسمو خالد اتخرج و بفتش ليهو في شغل و عندها اختها اكبر منها اسمها منار و بتقرا في جامعة الخرطوم سنة تانيه .. المهم ريان بت حلوة و مزة و حلبية و طولها عادي و شكلها حلو يلفت نظر اي زول.. ريان بريئة و طيبة و البراءة واضحه في وشها و كمان محترمة شديد و حساسه و في نفس الوقت اجتماعيه شديد و كل المدرسه بتحبها.. ريان حياتها عادية شديد امها بتصحيها الصباح بدري عشان تقرا قبل م الترحيل يجي و بعد م تقرا و تجهز بتقعد تتونس مع ابوها شويه قبل م يطلع الشغل و بعداك بتمشي المدرسه و ترجع من المدرسه الساعه 2 و تنوم و تصحى العصر تقرا و بعداك تتونس مع ناس البيت و تمسك تلفونها كل يوم من المغرب لحدي العشاء بس يعني ساعتين كدة بالكتير و بعداك بتقفلو و دي اوامر من ابوها و لانها بتحبو شديد بتسمع كلامو بالحرف ..*
*في يوم كدة و من بعد المغرب ريان فتحت تلفونها و دخلت الواتس عادي بتتونس مع صحباتها .. فجاءة في وحدة صحبتها من المدرسه اسمها مروة رسلت ليها رابط بتاع قروب ..*
ريان { دا شنو ؟
مروة { شايفه شنو انتي ي ريان .. رابط بتاع قروب ..
ريان { قروب بنات ..
مروة { لالا .. اولاد و بنات
ريان { اهااا ..
مروة { اها خشي ..
ريان {.دقيقه ..
*ريان في الواتس حقها ماف ولا ولد الا اولاد اهلها .. اما الباقين كلهم بنات و م حصل دخلت قروب فيهو اولاد و لما مروة رسلت ليها الرابط م عرفت تدخل ولا لا .. ريان اساسا م حصل اتكلمت مع ولد م بتعرفو او غريب قبل كدة سواء في التلفون او في الحقيقه و لو دخلت القروب دا ح يكون اول قروب تدخلو فيهو اولاد .. ريان فكرت كتير و قبل م تقرر ح تدخل ولا لا رسلت لي صحبتها هديل ..*
*هديل اكتر وحده مقربة من ريان و ساكنة جيرانهم طوالي و كمان هي ممتحنه السنة دي بس م معاها في نفس المدرسة ..هديل عكس ريان خالص يعني هديل بتعرف اولاد كتار و بتقابل اولاد كتار و كمان مرتبطة ليها بي ولد كدة و عايشة دنيتها .. و مع انها صحبت ريان شديد لكن نهائي م فكرت تخرب طبع ريان و كانت بتحبها و هي كدة و م حصل في يوم قالت ليها تعالي اعرفك على ولد او رسلت ليها رقم ولد او كدة*
ريان { ي هديلللللل
هديل { اها مالك
ريان { رسلو لي رابط قروب فيهو اولاد .. ادخل ولا لا
هديل { من متين ي ريان و دي منو الرسلتو ليك اصلا
ريان { دي مروة
هديل { اصلا لازم تكون مروة .. مش قلت ليك م تحتكي بيها كتير
ريان { م بحتكى بيها والله بس هي براها
هديل { المهم ي ريان م تخشي القروب دا و بس ..
ريان { لي
هديل { انتي جيتي تساليني ولا تاخدي راي
ريان { الاتنين
هديل { بس م تخشي ي ريان ..
ريان { وريني لي ياخ ي هديل انا نفسي اجرب
هديل { تجربي؟؟ شنو هو لعبة هي .. عايني ي ريان انا عارفاك كويسه و عارفه انك م حصل اتكلمتي مع ناس غريبة خصوصا اولاد و انا خايفه انك م تعرفي تتعاملي معاهم و انا عارفه حنك القروبات و الكلام دا كويس
ريان { م بتكلم مع اي ولد
هديل { مستحيل ..حتى لو م اتكلمتي هم ال ح يتكلمو
ريان { م بشتغل بيهم .. طيب عايني انتي ادخلي معاي القروب بس
هديل { قروباتي كتيرة و تلفوني عايز يطرشق من الرسايل
ريان { خلاص ي هديل انا ح ادخل و اي شي ح اوريك ليهو طيب
هديل { م عارفه اقول ليك شنو لكن راسك قوي .. خلاص ي ريان بس بشرط توريني اي شي اول ب اول
ريان { حاااااضر ..
*ريان بينها و بين نفسها حست انها عايزة تشوف الكلام و الونسه بتكون كيف و كانت عايزة تتونس و تتكلم مع ناس م بتعرفهم يعني بالواضح كدة ريان زهجت من ال
ناس البتعرفهم و نفسها تعرف ناس جديدة اي كانو اولاد او بنات بس في حدود القروب م اكتر ..*
*ريان فتحت الرابط و دخلت القروب .. و ي دوب ح تشوف اسم القروب و كدة لقت امها في وشها و قالت ليها خلاص خلاص وقت التلفون انتهى .. ريان طوالي قفلت التلفون و قامت ..*
*اليوم التاني ريان وصلت المدرسه و مروة جات قعدت جمبها و قالت ليها شايفاك دخلتي القروب .. ريان قالت ليها اي بس لسه م شوفتا حاجه .. مروة قالت ليها ح يعجبك صدقيني .. ريان قالت ليها فيهو اولاد كتار ؟؟ مروة قالت ليها يعني زي 10 كدة بس م كتار .. ريان قالت ليها و البنات ؟ .. مروة قالت ليها 9 بيك انتي 10.. ريان قالت ليها تميتو بي العدد يعني ههههه .. مروة قالت ليها ممكن تقولي كدة .. اصلا فكرة القروب حقنا 10 بنات و 10 اولاد بس في بت غادرت .. ريان قالت ليها و القروب دا جديد يعني ؟ .. مروة قالت ليها ايوا عملناهو امبارح .. ريان قالت ليها ايواااا .. و الناس الفيهو بعرفو بعض ؟.. مروة قالت ليها شوفي انا افهمك الفكرة حقت القروب اصلا .. ريان قالت ليها اها ..*
مروة { القروب دا فكرنا فيهو انا و واحد صحبي اسمو قصي .. يلا الفكرة كالاتي كانت انه انا ادخل 9 بنات من صحباتي و هو يدخل 9 اولاد من اصحابو
ريان { اها ..
مروة { يلا اوريك الفكرة وين .. اصلا لازم كل الاولاد و البنات يكونو سناجل
ريان { يعني شنو سناجل
مروة { انتي جادة ي ريان م بتعرفي يعني شنو سناجل او سنجل
ريان { لالا .
مروة { انا عارفاك هبلة بس م قايلة للدرجه دي
ريان { اها وريني
مروة { سنجل يعني وحيد يعني م مرتبط و م داخل في علاقه .. فهمتي
ريان { اهاااا .. طيب اها
مروة { يلا ركزي معاي في الحته دي .. يلا اول شي صحبي قصي دا بعد م اختار ال 9 اولاد السناجل من اصحابو يلا قبل م يدخلهم القروب سأل اي واحد فيهم المواصفات ال هو عايزها في البت ال حيرتبط بيها .. كل المواصفات .. شكل و طبع واسلوب اي شي بالتفصيل ..يلا بعداك قصي وراني المواصفات ال 9 و انا على حسب المواصفات ال 9 ديل اي وصفة فيهم قدرتا القاها في 9 من صحباتي و عملنا القروب و دخلتا انا ال 9 بنات ال هم برضو سنجل طبعا و هو دخل ال 9 اولاد الكتبو مواصفاتهم .. يلا الحركة الظابطة في انه نحنا م ح نوري اي ولد في القروب بي البت ال هو وصفها و لازم يعرفها براهو مع مرور الايام و الونسه و كدة .. بس في وقت معين و لما الوقت دا ينتهي لازم اي ولد يختار من ال9 بنات ديل البت ال هو مفروض يكون عرفها من ونستها و كلامو معاها ..فهمتي ؟
*ريان كانت منططة عيونها و بتعاين لي مروة و كان في سؤال لازم تسألو ليها و قالت ليها انتي دخلتيني القروب دا ليه ؟؟*
مروة { سؤال طبيعي لكن غبي شوية ي ريان .. ب اختصار كدة لانه انتي ي ريان في واحد من اصحاب قصي كاتب مواصفاتك بالظبط والله ..
ريان و هي مخلوعه قالت ليها { انا ؟؟
#فتاة_أحلامي
#يا_شيييييييييخة
بقلم .. كيمو 🍟
♤2♤
ريان و هي منططة عيونها قالت ليها .. { انا ؟؟
مروة { اي انتي ي ريان
ريان { م عارفه لكن امكن انا م عايزة اعرف ولد او ارتبط اصلا ..
مروة { طيب م ح نجبرك عادي يعني ممكن تطلعي ..
ريان { و البنات الفي القروب ال هم صحباتك ديل عارفين الغكرة
مروة { ايواا اصلا ي بت و موافقين
ريان { في بنات منهم من المدرسة ؟
مروة{ لالا انتي البت الوحيدة الصحبتي من المدرسه .. الباقين كلهم صحباتي م بتعرفيهم انتي ..
ريان { اها و الاولاد ؟
مروة { مالهم ..
ريان { يعني امكن البنت م تقبل بي الولد يعني امكن شكلو م يعجبها او شخصيتو او كدة
مروة { امكن اي عادي .. بس الموضوع كلو زي التجربة كدة و البحصل بينهم نصيب بنقول ليهم مبروك ..
ريان { انتي في حتة م فهمتيني ليها
مروة { اها
ريان { مش قلتي لي في وقت معين و في الاخر لازم اي ولد يقول و يختار اي بت من القروب و امكن تطلع ال هو اصلا موصفها و امكن لا ..
مروة { اي بالظبط و اذا كان سؤال عن المدة او الزمن يعني .. ح يكون 20 يوم بس
ريان { اهااا .. بس دا م سؤالي ..
مروة { اها
ريان { يعني بعدين لو في بت طلع عليها الاختيار من اكتر من ولد
مروة { يعني قصدك مثلا ولدين او اكتر يختارو نفس البت
ريان {ايوااا .
مروة { اذا كان فيهم الولد الصح خلاص حلال عليهو و الباقين خلاص خسرو .. الموضوع ي ريان ممكن تقولي عليهو زي اللعبه كدة بس في الاخر لو الولد اختار البت ال هو وصفها البت اساسا ح تفرح شديد انه قدر يعرفها و يحس انه دي البت ال هو عايز فيها مواصفاتو كلها و ان شا الله يتعرفو على بعض اكتر و يكملو بعداك .. عرفتي كيف
ريان {اهاااا .. برضو عندي سؤال تاني
مروة {ي ربي اها ..
ريان { انتي و صحبك دا
مروة { انا و قصي يعني ح نكون زي المشرفين بس و مرات مرات نخش نتونس معاكم و نتابع الاوضاع . لحدي م يخلص العشرين يوم و بعداك قصي يشوف اختيار اصحابو و نعلن النتيجه في القروب
ريان{ اهااا ..
مروة { خلاص و لا في سؤال تاني
ريان { لالا م اظن ..
مروة { خلاص تمام ..
*ريان طول الوقت في المدرسه كانت سرحانة في موضوع القروب دا و بتفكر انه فيها مواصفات من زول معين و الفكرة دخلت راسها و قلبها كان بدق سريع و عايزة متين تصل البيت عشان تفتح القروب و تشوف الحاصل ..*
*ريان وصلت البيت و نامت و صحت و العصر بدت تقرا شويه و المغرب طوالي فتحت تلفونها و دخلت القروب و اسم القروب كان ( فتاة احلامي ) .. ريان الاسم عجبها و قعدت تتبسم كدة و دخلت القروب و لقت رسايل كتيرة و بدت تقرا في الرسايل و النوسه فجاءة في واحد اسمو محمد عمل ليها تاق و قال ليها مالك ساكتة ي شييييخة .. ريان شافت الرسالة و م عارفه ترد ولا لا ..في الاخر ردت عليهو و قالت ليهو ي هلا و اسمي ريان هههه م شيخه ..*
محمد {هههه طيب ي ريان من امبارح م اتكلمتي ..
ريان { اي يادوب خشيت
محمد { اهااا. طيب عرفينا عن نفسك
ريان { عادي يعني ؟
محمد { اي بس لكن تقولي ساكنة وين و بتقري وين .. صح ي قصي ؟
قصي { اي صح .. و م ممكن تقولي اكتر من كدة .. و كمان ممنوع الدخول للخاص الا بعد ال 20 يوم و بعد اعلان النتيجة و الاختيارات
محمد { اي اي عارفين ..
ريان { انا ساكنة اركويت و بقرا في مدرسة الامتياز ..
محمد { اهااا .. وانا محمد ساكن الكلاكلة و بقرا في جامعة السودان
ريان { ايوااا
احمد { نورتينا ي ريان انا احمد .. ساكن الكلاكلة برضو و بقرا في الخرطوم
ريان { نورك والله
*فجاءة هديل اتصلت على ريان .. ريان طوالي ردت عليها ..*
هديل { على فكرة انا لي ساعه برسل ليك في الواتس و انتي سافهاني .. دخلتي القروب و خلاص م بتطلعي منه
ريان { لالا ياخ م كدة ..
هديل { اها شنو ..
ريان { التلفون صامت والله و م سمعت صوت الرسايل ..
هديل { م علينا .. اها القروب كيف .. في ولد دخل ليك الخاص؟
ريان { لالا خالص .. القروب عادي و بتونسو عادي كمان
*ريان خافت انها تكلم هديل بي فكرة القروب وكانت خايفه من ردت فعلها و امكن تقول ليها لازم تطلعي منو .. عشان كدة ريان م قالت ليها حاجة و قالت ليها بس انه قروب عادي ..*
هديل { خلاص عايني انا اتصلتا ليك عشان بكرة ح اقابل ميدو لانه عيد ميلاد اختو الصغيرة عازمني عليهو و م عارفه اشيل هدية شنو .. فكري معاي
ريان { هدية لي اختو يعني
هديل { ايي و عايزة اجيب لي ميدو برضو
ريان { اختو دي كم سنة
هديل { 12 تقريبا
ريان { انا شايفه انك لو اشتريتي تطورطة و شلتيها ليهم بكون احسن من هدية و بتاع .. و بالمرة التطورطة ليهم الاتنين ..
هديل { بس ميدو عندو سكري
ريان { سكري عديل .. من اسي عندو سكري
هديل { اي .. م عايزة اشيل ليهم تطورطة لانو م ح ياكل منها ..
ريان { خلاص ي هديل اساليهو هو عادي من اكتر حاجه بتحبها اختو و جيبيها ليها
هديل { طيب طيب بشوف ..
ريان { طيب
*ريان قفلت من هديل و دخلت القروب تاني و بد
ت تقرا في الرسايل و رسلت ليهم هلا و طوالي الولد الاسمو احمد رد عليها و الولد الاسمو محمد برضو و ديل اكتر اتنين كانو بتكلمو معاها و هي بتتكلم معاهم و اتونست كتير لحدي م وقت التلفون انتهى و قفلتو ..*
*تاني يوم في المدرسه مروة جات جمب ريان و بتتونس معاها و قالت ليها اها القروب كيف .. ريان قالت ليها حلو والله و الناس ظريفه .. مروة قالت ليها شايفه في ولدين كدة مركزين معاك .. ريان قالت ليها اي اي .. مروة بقت تضحك و قالت ليها احتمال يكون هناي داك واحد منهم .. ريان بقت تتبسم و قالت ليها خلاص خلاص اسكتي ..مروة بقت تضحك و قالت ليها بنشوووووف ...*
*ريان رجعت البيت واول م وصلت البيت م نامت و فكرت تفتح التلفون و كانت عايزة تفتح القروب و تتونس .. و فعلا فتحت التلفون و اندمجت في القروب ..اختها منار جات راجعه من الجامعه و شافتها ماسكة التلفون ..*
منار { دا شنو ي ريان لي ماسكة التلفون
ريان { عليييييييييييييك الله ي منار م تكلمي امي ولا ابوي ..
منار { و لي خلاص فتحتيهو ..
ريان { زهجانه ي منار و زهجت من القراية الكتيرة و م جايني نوم قلتا افتحو شويه
منار { عارفه لو ابوي شافك ح يزعل منك و امي ح تشاكلك
ريان { اكيد انتي م ح تكلميهم صح .. بس اخر مرة ي منار
منار { كويس ي ريان ..
ريان { بحبك انا ياخ ...
#فتاة_أحلامي
#يا_شيييييييييخة
بقلم .. كيمو 🍟
♤3♤
*مر كم يوم و ريان بقت مدمنة على القروب و كل م تمسك التلفون بس تدخل القروب تتونس و اكتر اتنين بتتونس معاهم و بتونسو معاها محمد و احمد.. هديل لاحظت انه ريان بقت مشغولة كتير بالقروب الدخلتو دا و بتسفها كتير في الواتس .. يوم كدة هديل كانت زهجانة شديد و مشت لي ريان في البيت ..*
ريان { عليك الله م تزعلي ي هديل
هديل { لالا ي زوله م حنك لقيتي ناس اهم مني
ريان { لا والله .. انتي اهم زول في حياتي
هديل { خلاص
ريان { خلااااص عليك الله م تزعلي مني
هديل { اصلا انا م زهجانه بسببك
ريان { اها من شنو طيب
هديل { ميدو
ريان { اها مالو ؟
هديل { اتشاكل مع ناس بيتهم و مرق ليهم من البيت و اسي قاعد مع صحبو
ريان { لي لكن .. معقوله بس في زول بتشاكل مع ناس بيتهم
هديل { م عارفه ياخ ي ريان اسي انا خايفه عليهو شديد
ريان { عادي ي هديل قاعد م صحبو
هديل { برضو ياخ م ممكن يكون متشاكل مع ناس بيتهم و م قاعد في البيت
ريان { مشكلة ..
هديل { كبيرة ي ريان ..
ريان { صحي العيد ميلاد حق اختو كان كيف م حكيتي لي
هديل { هو انتي فاضية لي اصلا
ريان { م قلنا معليش ي هدولتي
هديل { مشكلتي م بقدر عليك .. كلمة وحده منك بفصل ..
ريان { ههههه عسل ..
هديل { كان حلو والله .. ميدو بحب اختو شديد والله و امكن يكون بحبها اكتر مني كمان ..
ريان { حظها والله
هديل { شديد .. ي ريت لو كان عندي اخو زيو
ريان { م خلاص كفايه هو حبيبك اسي ..
هديل { اي حبيبي .. لكن بتمنى لو كان عندي اخو زيوو .. لكن برضو ميدو دا معوضني و هو حبيبي و اخوي و اي شي
ريان { نفسي اشوفو انا ميدو بتاعك دا
هديل { المشكلة اني م عندي ليهو صور و هو م بحب يرسل لي صور نهائي بقول لي نحنا بنتلاقه اصلا الصور ماف داعي ليها ..المهم بعد م نخلص من الامتحانات دي يوم بسوقك معاي
ريان { طيب ..
هديل { المهم يلا انا راجعه البيت
ريان { طيب يلا ..
*ريان بقت تمسك تلفونها كتير و دايما في القروب و منار لاحظت ليها بس م اشتغلت بيها كتير ..المهم مرت الايام و ريان م كان بعدي عليها يوم الا وتتونس مع الناس في القروب بالزات احمد و محمد المركزين معاها شديد .. لحدي م ال 20 يوم انتهو و مروة و قصي خلاص بكرة ح يعلنو النتيجه و اي ولد من الاولاد ح يختار البت ال هو حاسي انها هي حبيبتو القدم فيها المواصفات و ح يشوفو كلهم النتيجه بكرة ..*
*ريان الصباح في المدرسه قعدت جمب مروة ..*
ريان { اها جهزتو النتيجه ؟
مروة { ايوااا
ريان { اها .. انا اختارني الزول الوصفني ولا لا
مروة { بعدين ح تعرفي
ريان { لالا وريني اسي م بقدر انتظر لي بعدين .
مروة { انتي شاكة في منو
ريان { م عارفه
مروة { خلاص اصبري لي بعدين بس
ريان { اصلا شاكة في محمد او احمد لانهم اكتر اتنين محتكين بي
مروة { امكن واحد منهم صح و امكن الاتنين يكونو م صح
ريان { امكن .. متشوقه شديد انا ..
مروة { اسي لو طلع واحد منهم ي ريان ح ترتبطي بيهو ؟
ريان { والله ي مروة هي حاجه حلوة شديد انك تكوني فتاة احلام واحد و عندو مواصفات يلقاها فيك بالظبط .. بس برضو انا كمان عندي مواصفات لازم تكون فيهو ..
مروة { و كما طلعت فيهو
ريان { اصلا مواصفاتي م شكلية عشان كدة م بتكون صعبه
مروة { بالعكس ي ريان المواصفات الروحيه اهم من الشكلية
ريان { فعلا برضو بس كدي لما نشوف
مروة { اي بس انتظري لي بعدين ..
ريان { طييييييب ..
*فعلا جا الوقت ال قصي و مروة ح يعلنو النتيجه و ح يكتبو اسم اي اتنين مع بعض في رسالة .. و الناس كلها في القروب منتظرة النتيجه ..محمد قال لي ريان اها متحمسه ي شيييييخة .. ريان قالت ليهو للمرة الالف م تقول لي شيخة ي غبي اسمي ريان ريااااان .. محمد قال ليها ههههه خلاص م تكوركي ..*
قصي { طيب ح نبدا بي اول اتنين
مروة { اول اتنين معانا .. ياسر و ملاذ .. ياسر اختيارو و احساسو بي ملاذ كان في محلو و ان شا الله يتفقو مع بعض ...
*الناس كلها بقت تبارك ليهم و كدة ..*
*و بعد م قصي و مروة اعلنو 8 نتايج و كان منهم الصح و منهم الغلط و في بت م تم اختيارها اصلا من البنات.. في الاخر وصلو لي اخر نتيجه و كان فيها بت وحده و ولدين و اساسا م باقي الا ريان و محمد و احمد ..*
مروة { طبعا زي م شايفين باقي ريان و محمد و احمد و طبعا محمد و احمد الوحيدين الاتفقو على بت وحده و في واحد منهم صح و التاني غلط .. يعني ب اختصار في واحد منهم مواصفات فتاة احلامو في ريان و كمان قدر يعرفها من بين ال 8 بنات ..
*ريان بقت متوترة و منتظرة تعرف .. و كل الناس في القروب منتظرين يعرفو ..*
قصي { اها ي مروة تقولي انتي ولا اقول انا
مروة { قول انت
قصي { لالا قولي انتي
ريان { خلصونا ياخ
مروة { خلاص خلاص انا ح اقول ..
ريان { اها ..
محمد { اها ..
احمد { اها ..
*فجاءة ريان شافت ابوها قدامها و قال ليها ريان وقت التلفون انتهى ليه
و ساعة خلاص ولا اقول ليك جيبي اصلا الايام دي ملاحظ ليك بتشيلي اكتر من الوقت.. ريان عاينت لي ابوها كدة و كانت نفسها يخليها بس دقيقه تاني بس للاسف م بتقدر و طوالي قفلت التلفون و ادتو ليهو حتى بدون م تعرف النتيجة و الاختيار الصح كان محمد ولا احمد.. ريان زعلت شديد و طوالي رقدت نامت ..*
مروة { النتيجه الاخيرة .... ريان و ممحمممدددد ...
محمد { كنتا متاكد ياخ والله انها هي دي
مروة { مبروك .. وينك ي ريان ؟
قصي { وين ريان ي جماعه ؟
محمد { م بتستلم الرسايل .. تكون طلعت ؟
قصي { كيف تطلع م عايزة تعرف النتيجة يعني ..
مروة { هي اصلا ي جماعه بتطلع كل يوم زي الوقت دا
محمد { بشيلو منها التلفون يعني
مروة { تقريبا كدة..
محمد { اهااا
مروة { خلاص انا بكرة في المدرسه بكلمها ان شا الله
محمد { طيب ...
قصي { طيب ي شباب شكرا ليكم و كانت تجربة حلوة و مبروك لي اتنين و ان شا الله يتفقو و ح نقفل القروب يلا.....
*فعلا قصي قفل القروب و حذفو و كل الناس غادرت .......*
#فتاة_أحلامي
#يا_شيييييييييخة
بقلم .. كيمو 🍟
♤4♤
*ريان تاني يوم اول م وصلت المدرسه و لاقت مروة طوالي سالتها اها اها وريني سريع .. مروة بقت تضحك و قالت ليها انتي امبارح لي طلعتي طوالي ريان قالت ليها انتي م عارفه ي مروة شالو مني التلفون المهم اها ياخ يلا وريني منو احمد ولا محمد ..مروة بقت تضحك فيها و قالت ليها م قايلاك بايرة كدة...*
ريان { ي ربي .. ح تقولي ولا لا
مروة { طيب تتوقعي منو انتي
ريان { م عارفه والله
مروة { طيب انتي عايزة منو
ريان { شنو هو عايزة منو .. هم الاتنين ظريفين والله ..
مروة { محمد
ريان { بالجد ؟
مروة { اي والله
ريان { اهااا كويس والله
مروة { ح يكون رسل ليك في الخاص ..
ريان { لما ارجع بشوف ..
*ريان خلاص راسها بقى يفكر و م قادرة تركز في الحصص و تفكيرها كلو في محمد ح تتكلم معاهو كيف و ح يقول ليها شنو و م قادرة تصدق انها ممكن ترتبط بي ولد و كدة ..*
*ريان وصلت البيت و ارتاحت و قرت و المغرب فتحت التلفون و دخلت الواتس لقتو مرسل ليها كم رسالة .. و بقول ليها .... انا كنتا متاكد انك ياها .. طيبتك و عفويتك و كلامك الهادي .. حتى ونستك الظريفه المحترمة .. كلها صفات انا متمنيها فيك .. ريان قرت الرسايل و بقت تتبسم و قبل م ترد رسل ليها تاني و قال ليها يااا شيييييخة اخيرا خشيتي ...*
ريان { ههههه اي ي دوب
محمد { ليه وين من امبارح
ريان { بشيلو مني التلفون و كدة
محمد { اهااا
ريان { اي ..
محمد { م فرحانه ؟
ريان { على شنو ؟
محمد { عشان انا قدرتا اعرفك و اختارك
ريان { امممم
محمد { من زمان و انا بفتش فيك
ريان مع نفسها قالت واي واي م بقدر ارد و كتبت ليهو ..{ الكلام دا م بعرف ارد عليهو ..
محمد { م ضروري اسمعيني بس طيب
ريان { طيب اها
محمد { ح تستغربي اني م شوفتك و لا بعرفك و عايز ارتبط بيك .. بس انتي فيك كل المواصفات ال انا عايزها مع البت ال حا استمر معاها ..
ريان { ايوااا
محمد { موافقه اننا نقرب من بعض ؟
ريان { موافقه بس بي شرط ..
محمد { قولي طوالي
ريان {من اسي لو ح تخليني خليني .. لاني دي اول مرة ارتبط و عايزاها اخر مرة .. ي ريت تكون جادي
محمد { اكييييد جادي و مستحيل اخليك .. هو انا م صدقتا لقيتك
ريان { طيب
محمد { موافقه ؟
ريان { موافقه ..
محمد { اها عرفيني على نفسك اكتر
ريان { طيب
محمد { بي ريكورد
ريان { لالا اصبر علي م طوالي كدة ..
محمد { طيب البريحك ..
ريان { طيب انا ممتحنه تالته السنه دي و عندي اخت اكبر مني و اخو اكبر مني
محمد { ايوااا
ريان { وانت
محمد { انا بقرا في تانيه جامعه السودان و عندي اخت اصغر مني و اخو اصغر مني برضو
ريان { اهاا حلو والله
محمد { اي
ريان { طيب انا طالعه لانو الزمن خلاص و بكرة نتكلم
محمد { بدري ياخ ..
ريان { م بي يدي والله يلا يلا ..
*ريان طلعت ..*
*محمد كان قاعد مع واحد صحبو اسمو امجد و كان واضح انه مبسوط ..*
امجد { شنو ي عمك فرحان كدة
محمد { لقيتها ي مان خلاص
امجد.{ شنو هي
محمد { البت البفتش فيها
امجد { اتعرفتا عليها و كدة
محمد { ممكن تقول كدة
امجد { شنو ي مان انت دي البت الكم كدة ترتبط بيها
محمد { ي زول دي الاهم .. الباقين ديل بالنية ساي
امجد { خلاص م نفسك تعز اخوك ي مان
محمد { ي ريت والله لكن صعبه
امجد { خانق اللغو كلو انت
محمد { ههههه لازم ..
*مرت الايام و ريان كل يوم بتخش الواتس بس تتونس مع محمد و تطلع و بقت م شغاله بي اي زول حتى هديل بقت م شغاله بيها كتير و ريان بقت تسرح كتير و تفكر في محمد و نفسها تشوف شكلو كيف و خجلانه تقول ليهو رسل لي صورتك لحدي م جا يوم و قررت انها ح تقوي قلبها و ح تقول ليهو ..*
ريان { ممكن اطلب منك حاجه ي محمد
محمد { اكيييد ..
ريان { ممكن ترسل لي صورة ليك ...
*محمد شاف الرساله و م رد ليها سريع و هي كانت منتظرة .. في الاخر رد ليها و قال ليها م عندي صور و م بحب اتصور ولا ارسل صور .. و اذا عايزة تشوفيني انا م عندي مشكله ممكن اقابلك في اي يوم .. ريان زعلت شويه لانها كان نفسها تشوفو و قالت ليهو م بقدر اقابلك قريب لاني عندي قرايه و ماف طريقه .. محمد قال ليها خلاص م مستعجلين ..ريان كانت مستغربة لانو م قال ليها رسلي لي صورة ليك لحدي اسي ..قامت سجلت ليهو ريكورد و قالت ليهو غريبة يعني لحدي اسي م قلتا لي عايز صورة لي .. محمد رد ليها و قال ليها لاني خايفك تفهميني غلط او تاخدي عني فكرة م صح وانا حبيبتك بي اسلوبك و طريقتك و شخصيتك قبل شكلك ..وانا زول عايزك لي قدام معاي دايما و م عايز اخسرك*
*ريان الكلام اقنعها و قالت ليهو عشان كلامك دا انا ح ارسل ليك صورة لي ..محمد فرح و داير يطير من الفرحه و قال ليها طيب .. شوية كدة و ريان رسلت ليهو صورة محترمة كدة و وشها ظاهر الصورة كانت حلوة شديد .. محمد شافها و رسل ليها قلوب كتيرة و قال ليها انها حلوة شديد زي م كان متوقعها ..*
ريان
{ شكرااا ..
*هديل جات لي ريان في البيت و قعدت معاها ...*
هديل { وينك مختفيه كدة ي عواليق انتي
ريان { قاعدة والله بس القرايه
هديل {القرايه ولا القروب
ريان { ههههه القرايه القراية .. و اصلا القروب طلعتا منو
هديل { جد.. لي لي
ريان { ساي زهجتا
هديل { اهاا ..
ريان { اها احكي شكلك زهجانه
هديل { اي والله زهجانه
ريان { لي مالك
هديل { م عارفه بس ميدو الايام دي متغير شديد
ريان { كيف يعني مالو
هديل { م عارفاهو .. م بخش الواتس كتير و م بتصل لي كتير .. يعني ليهو شهر كدة م ميدو البعرفو انا
ريان { امكن زعلان منك في حاجه
هديل { لالا .. ميدو صريح و كان في حاجه بقول لي طوالي
ريان { اها في شنو
هديل { م عارفة والله
ريان { جربتي اتكلمتي معاهو براحة
هديل { لالا ولا سألتو لحدي اسي
ريان {لازم تتكلمي معاهو و تعرفي مالو
هديل { م عارفه ي ريان والله انا بحبو شديد و مستحمله الايام دي بالعافيه و هو بعيد مني كدة
ريان { ان شا الله برجع زي م كان بس انتي اتفاهمي معاهو براحه
هديل { طيب بشوف ..
ريان { اي طيب
#فتاة_أحلامي
#يا_شيييييييييخة
بقلم .. كيمو 🍟
♤5♤
*مر كمان كم يوم و ريان كل يوم بتتعلق بي محمد اكتر و كلامهم مع بعض بكتر و الاهتمام زاد ..لحدي م في يوم ريان قالت لي محمد نلعب لعبة صراحه ..محمد قال ليها تمام .. اسالي سؤال وانا سؤال .. ريان قالت ليهو اسال انت اول ..*
محمد { طيب .. اخر مرة بكيتي متين و لي ؟
ريان { اول امبارح عشان امي شالت من التلفون قبل الزمن..
محمد { و لي شالتو قبل الزمن
ريان { م عارفه .. اصلا انا كنتا مشتاقه ليك شديد و عايزة اجي اتونس معاك
محمد { اهااا .. حتى انا ي روحي دايما بشتاق ليك
ريان { يلا سؤالي ..
محمد { اها
ريان { اقرب زول ليك ؟
محمد { حاليا و لا قبل م اعرفك
ريان { الاثنين ..
محمد { قبل م اعرفك .. اختي الصغيرة هي اقرب زول لي
ريان { اهااا حلوو الله يخليها ليك .. طيب و حاليا
محمد { حاليا بقو اتنين .. انتي و هي
ريان { احم احم
محمد { هههه عسل.
ريان { طيب عايزة اسال تاني
محمد { اهاا
ريان { اكتر زول بتكرهو ؟
محمد { خالي
ريان { خالك عديل؟
محمد { اي .. لانه بتشاكل مع امي كتير و انا م برضى و بقيت اكرهو شديد و بقيت اخلي ليهو البيت زاتو ..
ريان { لالا ياخ في النهايه دا خالك
محمد { خالي و اي شي لكن م يغلط فينا
ريان { طيب طيب خلاص اهدى.
محمد {طيب خلاص زهجتا
ريان { خلاص حبيبي خلينا اللعبه م تزعل
محمد { لالا عادي
ريان { طيب حبيبي انا طالعه مع ناس البيت ناكل اسكريم و كدة
محمد { ياا شيييييييخة.. حظك والله
ريان { ههههه حظي شنو دا اسكريم بس
محمد { اي برضو حظك.. لاني م باكلو
ريان { كيف يعني م بتاكلو ؟
محمد { عايني ي ريان انتي حبيبتي و انا م بقدر اخبي عليك
ريان { اها قول ياخ م تخوفني في شنو
محمد { انا عندي سكري ..
ريان { سكري ؟؟؟
محمد { اي من زمان و هو اصلا وراثه عندنا عشان كدة
ريان { سلامتك حبيبي ياخ م تشوف و اسفه
محمد { لالا عادي عادي ..
ريان { طيب انا ماشه
محمد {طيب خلي بالك من نفسك
ريان { حااضر ي روحي ..
*ريان طلعت مع ناس البيت و هي بتاكل في الاسكريم اتزكرت لما محمد قال ليها عندو سكري و اتاثرت كدة بس في لحظه كدة ريان اتزكرت انه كمان ميدو حبيب هديل عندو سكري و استغربت من الصدفه دي و بقت م قادرة تاكل الاسكريم من الصدمة و فجاءة اتزكرت انه محمد قال ليها انه اختو اقرب زول ليهو و في نفس اللحظة اتزكرت انه دا نفس الكلام القالتو هديل عن حبيبها ميدو ..*
*ريان دخلت في صدمه و بقت مصدومة و متفاجئة و خايفه ال في راسها يكون صح و منتظرة متين ترجع البيت و تمشي تتكلم مع هديل و في الطريق و هي راجعه و بتتزكر في كلام محمد اتزكرت لما قبيل قال ليها انه بكره خالو شديد و قبل كدة طلع ليهو من البيت .. و دا نفس الكلام القالتو ليها هديل قبل كم يوم لما حكت ليها انه ميدو متشاكل مع ناس بيتهم .. ريان اتاكدت 80 % من الكلام الفي راسها و طوالي اول م وصلت مشت لي هديل و قعدت معاها ..*
هديل { مالك ي بت نفسك قايم كدة
ريان { عايزة اسالك كم سؤال و جاوبيني طوالي ..
هديل { اهاا
ريان { ميدو حبيبك اسمو الحقيقي منو ؟
هديل { بسم الله انتي جايه اسي عشان تساليني السؤال دا
ريان { اها ياخ قولي
هديل { اسمو محمد .. اصلا اي ولد اسمو محمد بقولو ليهو ميدو
ريان { الله يطمنك .. و بقرا وين ؟؟
هديل { انتي جايه تساليني الاسئلة دي لي من زمان م سالتيها
ريان { بقرا وين ي هديل
هديل { بقرا في السودان
ريان { الله يطممممممممممنك ي هديل
هديل { ي بت مالك .. جنيتي انتي
ريان { جنيت زاتها شويه علي
هديل { في شنو ؟
ريان { اخر سؤال عشان اتاكد خااالص.. ميدو حبيبك دا عندو كلمة كدة بناديك بيها دايما
هديل { اي بناديني بي قلبي و حبيبتي
ريان { لا م قصدي ديل .. يعني كلمة كدة براها يعني زي كدة .. م عارفه اوصف ليك كيف لكن يعني كلمة كدة هو بقولها دايما
هديل { اهاا فهمتك.. اي اي عندو كلمة كدة دايما بقولها لي
ريان { ال هي ؟؟؟
هديل { ي شيخة
ريان { يااا شيييييييييييخة
هديل { اي اي .. مالك ي ريان ياخ فهميني
*ريان عاينت لي هديل و قالت ليها اتلعب بينا ي هديل اتلعب بينااااااااا .. و بقت تبكي .. هديل م كانت فاهمة حاجه و حضنتها و قالت ليها بتبكي مالك ي ريان ياخ ..*
*بعد م ريان كملت البكا حقها فهمت هديل على اي حاجه من البداية ..*
هديل و بدت تبكي { ميدو يعمل فيني انا كدة .. ميدو يخوني انا .. و يلعب بي انا .
*ريان حضنتها و الاتنين بقو يبكو ..*
هديل { انا مش ي ريان قلتا ليك م تدخلي اي قروب من الاول
ريان { انتي مفروض تقولي الحمدلله لانو لو م انا دخلت القروب م كنتي ح تعرفي انه خاين كدة
هديل { برضو ياخ
ريان { برضو شنو م تبقي عويرة ي هديل ..انتي اتعرفتي عليهو قبل كم بالظبط كدة
هديل و هي بتبكي { قربنا نتم سنه
ريان { و عرفتي وين
هديل { من الانستقرام ..
ريان { برضو .. م فرق كتير من الواتس .. والل
ه نحنا نستاهل زاتو اننا بنحب و بنتعلق لينا بي ناس بس عشان عرفناهم من الواتس ولا الانستقرام ..
هديل { ياخ انا حبيتو و هو بحبني وكنا بنتلاقه كتير .. معقوله في الاخر يجي يخوني
ريان { حتى انا م كنتا قايلاهو انه اصلا مرتبط و كمان مع صحبتي .. الكذاب الخائن ..
*هديل كانت مصدومه و م وقفت بكا اصلا .. و ريان بتهدي فيها و قالت ليها لازم نفكر نعمل شنو و لازم نأدبو والله م نخليهو عشان يكون عبرة لي اي ولد ..*
هديل { انا م عايزة اسمع سيرتو ولا عايزة اي زفت و مش رقمو دا هندا مسحتو و عملتا ليهو و بلوك من اي مكان اها اها .. و دي صورة كلها حذف حذف حذف ..
ريان { خلاص اهدي ي هديل
هديل { م بهدى ياخ ولا اي زفت ..اسي انتي امسحي رقمو قدامي و اعملي ليهو حظر
ريان { و نخليهو عادي كدة .. لازم م نسكت ي هديل
هديل { قلتا ليك امسحي رقمو اسي
ريان { لكن ي هديل
هديل { لكن شنو ..اهااااااا و لا انتي عشان بحبك و مواصفاتو كاتبها فيك و بموت فيك و م ح تقدري تخلي ..
ريان { انتي متخلفه ولا شنو ي هديل دا كلام شنو اكيد لا والله انا بس م عايزة اننا نسكت على العملو و البعمل فيهو دا
هديل { ح تمسحي رقمو ولا لا ؟
*ريان سكتت مسافه و كانت بتعاين لي هديل بنظرة استغراب ..فجاءة هديل قالت ليها برة .. اطلعي برة .. ريان اصبري ي هديل .. هديل م كانت شغالة بيها و م شايفه قدامها و قالت ليها برة لحدي م طلعتها برة غرفتها و ريان طلعت طوالي مشت بيتهم .. و اول م وصلت بقت تبكي و تبكي و دموعها دي ملت المخدة ..*
*ريان صحت الصباح وحده تانيه خالص و كانت زهجانه و متعصبة و مشت المدرسة و طول الوقت كانت بتفكر كيف انها تنتقم من محمد و من العملو فيهم دا و كانت بتفكر في كم فكرة تقدر تأدبو بيها .. بس في البدايه قررت انه تواجهو و تشوف ردت فعلو شنو .. و فعلا اول م رجعت البيت و ارتاحت و كدة .. المغرب مسكت التلفون و رسلت ليهو ..*
ريان { بتقدر تلاقيني الليله ؟
محمد { اسي يعني ؟ وين
#فتاة_أحلامي
#يا_شيييييييييخة
بقلم .. كيمو 🍟
♤6♤
ريان { بتقدر تلاقيني الليله ؟
محمد { اسي يعني ؟ وين
ريان { بتقدر تجي ؟
محمد { اي عندي عربية صحبي ممكن عادي
ريان { تمام .. في محل اسكريم جمبنا ح ارسل ليك اللوكيشن بتاعو و بعد ساعه بالظبط لازم تصل
محمد { طيب ..
*محمد كان فرحان انه ح يلاقيها و كان قاعد جمب امجد ..*
محمد { اسمع ي امجد .. عربيتك دي بس مشوار صغيرر
امجد { على وين
محمد {ماشي اشوف البرعم الحضران دا ي مان
امجد { عازي نفسك لكن ..
محمد { اها اها
امجد { هاك المفتاح
محمد { حبيبي ياخ
*محمد ركب العربية و فعلا بعد ساعه بالظبط وصل المكان و منتظر ريان .. ريان قالت لي ناس بيتهم انها ماشه تاكل اسكريم مع صحبتها و اصلا المكان قريب شديد منهم .. و فعلا لبست ليها عباية سريع و طلعت و في 5 دقايق وصلت المكان و شافت محمد قاعد و اول م شافها ابتسم ليها و قام مد ليها يدو .. سلمت عليهو و قعدو ..محمد طلع ولد طويل و وسيم و شكلو و لبسو حلو و ريان اول م شافتو اتحيرت لي ولد حلو زي دا بلعب بالبنات كدة ..*
محمد { الجميل سرحان وين
ريان { لا ولا مكان
محمد { اها شنو سبب الطلعة المفاجئة دي
ريان { اي صح .. عايزة ...
محمد قاطعها { ولا اقول ليك خليني اقول انا اول موضوع كدة
ريان { قول ..
محمد { ح تصدقيني و تسمعيني من قلبك ؟
ريان { اها قول
محمد{ طيب انا م عارف ابدا ليك من وين .. لكن اول شي انا م مصدق اني قاعد معاك .. يعني مع البت البتمناها ..
ريان { ممكن تخش في الموضوع طوالي
محمد { طيب طيب ..المهم انا لازم اكون صريح معاك من البداية عشان م اخسرك لاني اصلا م عايز اخسرك
ريان { اها ؟
محمد { انا مرتبط بي وحده تانية
ريان عاينت ليهو بنظرة كدة قاسية ..
محمد { عارف .. مفروض تقومي تديني كف عديل بس اعمل شنو انا .. انا بحبها شديد بس بحبك انتي اكتر ..
ريان { و ليه اصلا تحبني .. انا مالي
محمد { عشان انتي فيك كل المواصفات ال انا عايزها عشان انتي فتاة احلامي
ريان { لا ي شيخ .. و حابي البت الاول لي لو م فيها مواصفاتك ..
محمد { هي الحبتني اول و انا م حبيت احرجها
ريان { ماف حاجه اسمها م حبيت تجرحها .. دا حب و ارتباط م لعب
محمد { المهم امبارح فجاءة لقيتها حاظراني من اي مكان و م قادر اتصل ليها و على فكرة هي ساكنة اركويت هنا برضو ..
ريان { اركويت هنا ؟
محمد { اي و اسمها هديل م بتعرفيها ؟
ريان { لالا
محمد { المهم خلاص هي براها خسرتني و براها حظرتني و فصلتها .. احسن زاتو
*ريان و هي بتسمع كلام محمد قلبها وجعها شديد على هديل ..*
محمد { هييي بتسرحي وين انتي
ريان { لا ولا مكان
محمد { على فكرة انتي حلوة شديد
ريان { شكرا
محمد { مع انك متغيرة شديد لكن امكن في المقابله بتخجلي
ريان { اي ..
محمد { اها كنتي عايزاني في شنو ..
ريان { لا ولا شي خلاص .
محمد { كيف ولا شي
ريان { خلاص
محمد { خلاص ممكن اقول ليك حاجه
ريان { اتفضل
محمد بقى يعاين ليها في عيونها و قال ليها { انا بالجد ي ريان بحبك و م تقولي علي اني بلعب بالبنات و كدة بس انا والله بحبك و م عايز غيرك و من زمان بفتش في بت زيك و اخيرا لقيتها و مستحيل اخونك او اعرف بت عليك ..
*ريان كانت بتعاين ليهو و ساكتة بس و من جواها مستغربه كيف الاولاد ديل عندهم قلب قاسي كدة و انهم يلعبو بالبنات و يكذبو .. ريان في نفس الوقت كان في صوت تاني بتكلم من جواها و بقول ليها اخيرا دا زول بحبك بالجد و واضح من كلامو بغض النظر عن العملو في هديل بس هو اعترف لي و م كذب في حاجه و هو زول قدر يعرفني و يحس بي من وسط 8 بنات ..*
*ريان كانت ملخبطة شديد .. و م عارفه تقرر شنو و اصلا هي كانت عايزة تقابلو الليله عشان تنهي علاقتها معاهو و تسمعو كلام زي الزفت و توريهو انو البنات م مساكين و م بسكتو عن حقهم و كلام كتير لكن بعد كلام محمد ريان بقت ملخبطة و م عارفة تقول و تقرر شنو ..*
محمد { شكلك حلو شديد و انتي سرحانه ..
ريان ابتسمت ليهو ابتسامت مجامله و قالت ليهو { انا اتاخرتا و لازم ارجع
محمد { اهااا اي صح الزمن
ريان { طيب يلا
*ريان قامت طوالي من جمبو و مشت و هو قال ليها خلي بالللك من نفسك ..ريان وصلت البيت و تاني بقت تبكي و احتارت شديد و زعلانه على هديل شديييييد و م قادرة تتكلم معاها لانها م بترد عليها و رافضه انها تقابلها في البيت.. ريان في الاخر رقدت نامت لانو عندها مدرسه بدري بكرة ..*
*تاني يوم في المدرسه ريان كانت قاعدة و سرحانه بس و مروة جات قعدت جمبها ..*
مروة { اها ي جميل الامور ماشه كيف
ريان عاينت ليها و قالت ليها { زي الزفت
مروة { زي الزفت ؟؟ ليه ليه في شنو .. احكي
ريان { هو الحصل دا بتحكي
مروة { قلتا ليك احكككيي
*ريان حكت لي مروة الحصل كلوو..*
مروة { ابن اللذينة والله م نخليهو ..
ريان { م عارفه
مروة { هوي ي ريان ماف شي اسمو م عارفه م تقعدي تعملي لي امور الم
سكنة دي .. الود دا لا بحبك ولا حاجه .. الكذاب كذاب ي ريان و زي م كذب و خان هديل ح يكذب عليك و ح يخونك .. انا والله لو عارفه كدة م كان خليت قصي يدخلو القروب و اول م اصل البيت ح احكي لي قصي و هو يتفاهم معاهو
ريان { لالالا ي مروة اوعك تكلمي اي زول
مروة { اها و عايزة تعملي شنو .. عايزة تصدقيهو و تحبو بعض و بتاع ؟؟ عايزة كدة .. صدقيني بعد يومين ح يخليك ..
ريان { م ظنيت
مروة {ي بت انتي مجنونه شنو م ظنيت .. اسي انتي عايزة تخسري صحبتك و صحبت عمرك عشان واحد زي دا ..
ريان { م عارفه ي مروة ..
مروة { تمام اعتبري نفسك خسرتيني انا كمان
ريان { استني ي مروة
*مروة قامت من جمبها*
#فتاة_أحلامي
#يا_شيييييييييخة
بقلم .. كيمو 🍟
♤7♤
*ريان رجعت من المدرسه و كانت تعبانة و م مركزة و طوالي رقدت نامت ..*
*ريان م قادرة تاخد قرار و تفصل محمد و كانو سحرها و سيطر عليها .. حتى صحبت عمرها بتضيع منها ..*
*مرت زي 5 ايام و ريان بتتونس مع محمد دايما و بقت ناسيه اي شي و مركزة معاهو بس و هو مدلعها و محسسها انها اهم انسانه في حياتو .. لحدي م في يوم كدة محمد قال ليها انا نفسي اشوفك .. طوالي ريان قالت ليهو خلاص تعال مكان الاسكريم الليله ..*
*و فعلا بعد المغرب طوالي ريان قالت لي ناس البيت انها ماشه مع صحبتها الاسكريم و طلعت .. ريان وصلت و لقت محمد قاعد و قعدو يتونسو مع بعض ..فجاءة خالد اخو ريان و هو داخل على شارع البيت لاحظ لي ريان قاعدة مع زول غريب ..طوالي مشى عليهم و اول م وصل ريان لاحظت ليهو و اتخلعت و قلبها داير يطلع من مكانو و قامت كدة خالد قال ليها لالا اقعدي اقعدي و جرا ليهو كرسي و قعد ..محمد عاين لي خالد كدة و قال ليهو في حاجة ؟؟ .. خالد ضحك ضحكه مستفزة كدة و قال ليهو انت بتقول لي انا في حاجه .. محمد قال ليهو اي و يعني منو انت اصلا و بقى يعاين لي ريان.. ريان عايزة تتكلم كدة .. خالد قال ليها لالا خليك ساكتة ..*
محمد { م تقول ي عمك انت منو و عايز شنو
خالد بي صوت نهرة { انا اخوها الكبير
محمد طوالي فصل و سكت ساي ..
خالد { اها مالك سكتا
محمد { لالا ياخ معقوله
خالد { انت عارف ريان دي عندها كم سنه ؟
محمد سكت و م رد
خالد { عندها 15 سنه و لسه اصلا م تمت ال 16 يعني شافعه ب اختصار وانت بي دقنك دي على الاقل اكبر منها بي 5 سنه انا م عندي مشكله في عمرك انا عندي مشكلها في عمرها ..
محمد { لكن ...
خالد { لالا م تقول لي لكن .. انا بتكلم معاك بالعقل .. انت ك زول كبير كدة م ممكن تطلع ليك مع وحده شافعه و تقعد معاها براكم .. بتعرفها من وين و من متين ؟؟
محمد { من شهر و حاجه من الواتس في قروب
خالد { ايوااا يعني انت من ناس القروبات و الواتس و الكلام الفارغ دا
محمد سكت م رد
خالد { تمام .. شوف ي فردة حاليا كدة في القعدة ال نحنا فيها دي اقسم بالله لو تاني عرفتا انك اتكلمتا معاها او اتواصلتا معاها لاكون طاقي بيك اقرب حيطة ...اللهم بلغت .. قومي قدامي
*ريان حابسة دموعها بالرجاله و خايفه شديد و قامت قدام اخوها ... محمد بقى قاعد براهو و طوالي قام رجع ...*
*ريان و خالد وصلو البيت و ريان دخلت غرفتها طوالي و خالد دخل وراها و قفل الباب ..*
خالد { جيبي تلفونك ..
*ريان ادتو التلفون .*
خالد { من متين ي ريان ؟ من متين بتقابلي اولاد غريبة و براكم و بعد المغرب ..انتي عارفه انا اسي ممكن اضربك و اخبط بيك كل حيطة في الغرفه دي .. لكن م بقدر اعمل كدة عارفه لي ..عشان انا عارفك كويس و عارف انه دي م اخلاقك و عارف انك لسه شافعه و دي اول مرة انا اشوفك تغلطي غلط زي دا ..
ريان و هي بتبكي { اسفه والله
خالد { انتي لسه صغيرة ي ريان .. و الكلام دا م بنفع حاليا و م صح .. انا والله كان ممكن اضرب بيهو الواطة .. لكن انا زول واعي اكتر من كدة و التلفون دا م ح اديك ليهو الا بعد تخلصي امتحانات و حاليا ح تمسحي رقم الولد دا قدامي و تاني م تتواصلي معاهو خالص
ريان { حاضر
خالد { تمام ..
*مر كم يوم و ريان بقت مركزة مع قرايتها و بتحاول تنسى محمد بس م قدرت نهائي و استغربت من نفسها شديد انه الولد دا كانو عامل ليها سحر و كل م تركز مع القرايه تتزكرو و تتزكر كلامو الحلو و بقت م قادرة و حست انها مشتاقه ليهو شديد..*
*يوم في المدرسة ريان قعدت جمب مروة و قالت ليها مروة ممكن تكتبي لي رقمك في كراسي ..*
مروة { لي يعني ..
ريان { تلفوني شالو مني ..
مروة { طيب و عايزة بي رقمي شنو
ريان { بس عايزاهو ي مروة ..
مروة { مع اني لسه زعلانه منك لكن م مشكلة
ريان { غريبة الليله م جبتي تلفونك المدرسة
مروة { اي الليله نسيتو
ريان { و من بكرة ح تجيبي ؟
مروة { اي
ريان { طيب
*ريان اول م وصلت البيت طوالي مشت لي هديل و كالعادة هديل م عايزة تقابلها بس المرة دي ريان اقنعتها انها عايزة تتكلم معاها في موضوع ضروري و بعد تحنيس طويل هديل قعدت معااها و ريان حكت ليها الحصل مع اخوها....*
ريان { انا ااااااااسفه ي هديل عليك الله م تزعلي مني .. و خلاص اصلا التلفون زاتو شالو مني
هديل { احسن زاتو
ريان {اي
هديل { اصلا اخوك كلامو صح وانتي من البدايه كنتي تسمعي كلامي
ريان { خلاص ي هديل الموضوع انتهى .. المهم م نفسك تجيبي لي مويه عصير اي شي ..
هديل { غايتو جايه تشربي عندنا
ريان { ههههه اي
هديل { دقيقه خلاص ..
*هديل طلعت تجيب لي ريان مويه .. ريان سريع شالت تلفون هديل و كتبت رقم محمد و رسلت ليهو رساله sms و كتبت ليهو فيها ..( انا ريان ي محمد م تستغرب اصلا هديل دي صحبتي و انا اسي برسل ليك من وراها و هي م عارفه .. المهم هاك دا رقم صحبتي اسمها مروة و بتجيب م
عاها التلفون المدرسه و ممكن اتكلم معاك .. يلا يلا + اشتقتا ليك والله ..) و فجاءة ريان حست بي هديل جاية و طوالي مسحت الرساله و ختت التلفون..*
هديل { اتفضلي اشربي ..
*ريان شربت من الموية و قالت لي هديل يلا انا ماشه و طوالي طلعت ..*
*محمد كان قاعد مع صحبو امجد و بتوسنو ..*
امجد { اها اخبار البرعم داك شنو
محمد { ي زول والله انسى بس ..
امجد { لي الحصل شنو ..
*فجاءة محمد جاتو الرساله و فتحها و قراها و فرح و قعد يتبسم و من الفرحه الشديدة طوالي رد ليها و كان مفتكر انه ريان لسه ماسكة تلفون هديل .. المهم رد و كتب ليها ( والله انا كمان مشتاق ليك شديد و تمام ح احفظ رقم صحبتك و بكرة في المدرسه انتي اتصلي لي او نتكلم رسايل ..) ..*
*محمد انتظر و انتظر و ريان م ردت عليهو تاني و افتكر انها مسحت الرسايل من تلفون هديل و خلاص .*
امجد { اها ي عمك مالك فجاءة قعدتا تتبسم براك
محمد { تقول شنو بس .. انت عارف البرعم دا طلع صاحب وحده كنتا مرتبط بيها برضو
امجد { هههههه ي زول .. و م حصلت ليك مشاكل لسه
محمد { هوي ي زول انت م بتعرفني ولا شنو .. انا بس غلطتي اني حنكتا مع كم بت ساكنين اركويت .. وانت براك عارف اركويت دي قدر كيف و الخوف كلهم يطلعو بعرفو بعض
امجد { ههههه والله لكن ..
محمد { اسي في وحده خففت و قبل فترة فصلت نفسها براها .. تقريبا تكون عرفت اني بحب عليها صحبتها .. يلا احسن زاتو وفرت ..
*هديل قاعدة و ماسكه تلفونها فجاءة جاتها رساله sms و فتحتا ..*
#فتاة_أحلامي
#يا_شيييييييييخة
بقلم .. كيمو 🍟
♤8♤
*هديل فتحت الرساله و اول م قرتها م قدرت تستوعب الكلام الفيها طوالي لكن كانت عارفه انه دا رقم محمد و فهمت انه ريان رسلت ليهو رساله و دا ردو عليها بس كانت مستغربه صحبتها منو الفي المدرسه الادتو رقمها ...المهم هديل زعلت شديد من ريان و انها لسه بتتواصل معاهو و كمان تجي و ترسل ليهو من تلفونها .. هديل اول مرة تحتار في ريان بالطريقه دي و اصلا م كانت قايلاها ممكن تكون كدة ..هديل م عرفت تعمل شنو و كان في راسها انه الولد الاسمو محمد دا زي م طلع خاين معاها اكيد ح يطلع خاين ريان برضو و واضح انه بتاع بنات و مستحيل يحب بت بالجد بس ريان م عايزة تفهم ..*
*تاني يوم في ريان مشت المدرسه و اول م وصلت قعدت جمب مروة و في فسحة الفطور قالت لي مروة عايزة اقول ليك حاجه ..*
مروة { اها قولي
ريان { ممكن اتكلم بي تلفونك شويه ..
مروة { مع منو ؟
ريان { ود عمتي
مروة { و من متين كمان بتقولي لي عايزة تتكلمي
ريان { عندي معاهو موضوع مع اختو و جوطة كدة عرفتي و زي م عارفه تلفوني شالو مني
مروة { م عارفه اقول ليك شنو
ريان { يلاااا عليك الله
مروة { طيب طيب.. هاك
ريان { شكررررررررا ..
*ريان شالت التلفون و زحت بعيد من مروة و بدت تتكلم مع محمد بالرسايل ..*
محمد { ي قلبي والله مشتاااقين
ريان { كتييييير كتير شديد ..كيفك انت
محمد { تمام والله وانتي
ريان { تمام شديد بعد م اتكلمت معاك و ي ريت لو بقدر اسمع صوتك ..
محمد { في المدرسه انتي لكن
ريان { اي اي دي المشكله ..
محمد { حتى انا مشتاق اسمع صوتك
ريان { حبيبي والله ..
محمد { اها كيف مع اخوك
ريان { عادي معاي والله بس م اظن يديني التلفون تاني
محمد { اي اصلا ..
ريان { بس انا م بقدر م اتكلم معاك
محمد { حتى انا والله
ريان { هيييي خلاص الزمن جا م ترسل تاني ح امسح الرسايل و ارجع التلفون لي مروة يلا
*ريان بعد م اتكلمت مع محمد حست نفسها احسن و بقت تركز في الحصص و رجعت البيت فرحانه ..*
*هديل فكرت في فكرة و من بعد المغرب مشت لي ريان .. و اول م دخلت لي ريان ..*
ريان { مما جيتيني البيت معناها خلاص بقيتي م زعلانه مني خااالص صح
هديل { ممكن تقولي كدة
ريان { قلبي
هديل { مش انتي كسرتي حنك الولد دا خلاص
ريان { ااا ..اي اي كسرتو
هديل { اي كدة حلوين .
*ريان بي جواها قالت والله ي هديل غصب عني اسفه ..*
هديل { اها كيفك
ريان { تمام والله وانتي
هديل { الحمدلله
ريان { الحمدلله
هديل { ي الله
ريان { مالك
هديل { في حاجه دايرة اعملها في البيت و نسيت .. 10 دقايق و برجع ليك ..
*هديل خلت تلفونها و قامت سريع .. ريان لاحظت للتلفون و كانت عايزة تقول ليها تلفونك بس في لحظة اتزكرت انها ممكن تتكلم شويه مع محمد ..و فعلا بعد م ريان اتاكدت انه هديل طلعت طوالي شالت تلفون هديل و كتبت رقم محمد و رسلت ليهو ( محمد انا ريان وين انت) .. وفي اقل من دقيقه طوالي محمد رد ( ايوا ي ريان معاك.. تاني شلتي تلفون هديل) ريان ردت عليهو و قالت ليهو ( م تخاف اصلا نست تلفونها معاي و بعد 10 دقايق بترجع*
*ريان اتونست مع محمد شوية و لما سمعت هديل جايه طوالي مسحت الرسايل و قالت ليهو خلاص م ترسل و مسحت الرقم ..*
هديل { نسيت تلفوني صح
ريان { اي اي .. كنتا عايز اناديك لكن انتي طلعتي
هديل { خلاص يلا انا راجعه
ريان { شنو يعني طوالي كدة
هديل { عندي حاجات كتيرة لازم اعملها
ريان {اهااا طيب ..
*هديل شالت التلفون و طلعت و دخلت بيتهم و كانت متاكدة مليون في المية انه ريان ح تكون رسلت لي محمد .. المهم هديل اصلا حافظة رقم محمد .. كتبتو و رسلت ليهو ( محمد ) شويه كدة و رد عليها ..( انتي لسه ماسكة تلفون هديل ي ريان ..)*
*هديل اتاكدت انه ريان اتكلمت معاهو قبل شوية و طوالي ردت ليهو ( اي اي .. هديل رجعت تاني )*
محمد { اهااا
هديل { يلا انا عايزاك ترسل لي رقم صحبتي الرسلتو ليك قبل يومين
محمد { طيب .. لي لكن مش عندك هو
هديل { كنتا كاتباهو في ورقه و ضاع و عايزة اتصل ليها ضروري اسي يلا رسلو لي
محمد { طيب ي ريان
هديل { طيب
.
*فعلا محمد رسل الرقم و هديل على اساس انها ريان طوالي قالت ليهو يلا خلاص ح امسح الرسايل هديل جايه ..*
*هديل شالت رقم مروة و طوالي سريع اتصلت ليها ..*
هديل { الو
مروة { اهلين
هديل { مش مروة
مروة { ايواا
هديل { انا هديل
مروة { هديل منو ؟
هديل { هديل صحبت ريان
مروة { اهاااا
هديل { اي.. بتعرفيني صح
مروة { اي .. ريان طوالي بتحكي لي عنك .. و كمان الموضوع الحصل دا انا اسفه عليهو لانه الولد الاسمو محمد دا م قايلنو كدة و الا م كنا دخلناهو القروب و ريان زاتها قلبها ضعيف و بتصدق سريع و م عندها اي تجارب في الاولاد عشان كدة و الحركة العملتها معاك م ظريفه نهائي .. بس هي خلاص مش اخوها شال تلفونها و بقت م بتتكلم معاهو
هديل { اسمعي ي مروة انا ح افهمك ال ان
تي م عارفاهو و بعدها لازم تفكري معاي نعمل شنو
*هديل حكت لي مروة الحاصل ..*
مروة { بت اللذينه يعني هي لسه بتتكلم معاهو و كمان بتحبو و كمان اتكلمت معاهو بي تلفوني و كمان اتكلمت معاهو بي تلفونك انتي .. البت دي م بتخجل ياخ ..
هديل { انا اقتنعتا انه ريان دي هبله شديد و لانه دي اول مرة ترتبط م ح تقدر تفهم كلامنا و الود دا مستغلها شديد
مروة { و ح نعمل شنو ؟
هديل { م عارفه لكن نحنا لازم نأدب الولد دا لازم م نخليهو
مروة { و كمان لو خالد اخو ريان عرف انه لسه بتتكلم مع الولد دا م بعيد يعمل مشكله و م معروف زاتو البحصل شنو
هديل { فعلا ..لما قعد معاهم في محل الاسكريم مسك نفسو بالعافيه و اتصرف بي عقل
مروة { اي اي ريان حكت لي
هديل { اها ي مروة نعمل شن
مروة { م عارفه انا والله الموضوع غالبني عديل و انا لو قلتا ليك راي .. اننا نكلم قصي و قصي ممكن يتصرف معاهو يضارب معاهو المهم يخلي يفصل ريان
هديل { هي فكرة برضو لكن انا عايزة أأدبو الولد دا .. م ناسيه العملو فيني دا والله ..
مروة { بالجد العملو فيك صعب ..
هديل { م شوفتي والله ي مروة انا كنتا بشوفو احسن ولد في الدنيا اصلا م اتوقعتا انه يخوني في يوم
مروة{ حرام عليهو والله
هديل { عايني كدي لي بكرة انا بفكر و بشووف اوريك ح نعمل شنو
مروة { طيب
هديل { انتي خليك معاها عاديه عشان م تشك اننا عرفنا ..و كمان اديها تلفونك عادي
مروة { طيب
*هديل قفلت التلفون و رقدت و هي راقدة كانت بس بتفكر كيف تتصرف و مع التفكير الكتير قدرت تطلعها ليها بفكرة ظااابطة شديد و ح تأدب بيها محمد ..*
*تاني يوم هديل اتصلت على مروة ..*
هديل { اها ي مروة لقيتي فكرة
مروة { لسه والله
هديل { انا لقيت .. بس هي فكرة عميقه و لازم تتنفذ بالحرف ..
مروة { احكي طوالي و انا معاك ..
هديل { يلا اسمعيني
#فتاة_أحلامي
#يا_شيييييييييخة
بقلم .. كيمو 🍟
♤9♤
هديل { يلا اسمعيني ..
مروة { سامعاك ..
هديل { انتي مش ساكنه قريب مننا ؟ لي م بتجي لي ريان كتير
مروة { يعني م قريب منكم شديد لكن جيتها قبل كدة مرتين
هديل { يعني بتعرفي بيتهم
مروة { يعني اي
هديل { و بتعرفي مكان الاسكريم ال على الظلط ؟
مروة { اكيد
هديل { طيب يلا اسمعي ..انا عايزك بكرة م تخلي ريان تتكلم مع محمد يعني اتصرفي قولي ليها م عندي رصيد اي شي هي طبعا كل مرة طالعه ليك بي عذر انها بتتكلم مع ود عمها زي كل مرة ..
مروة { اصلا الليله كمان قالت لي قال ود خالها ..
هديل { غايتووو كذابه اصلا م عندها ولد خال .. المهم .. بكرة عايزاك انتي ترسلي لي محمد بصفتك ريان .
مروة { و اقول ليهو شنو
هديل { قولي ليهو انك م ح تقدري تتكلمي معاهو الليله ولا بكرة و يوم الجمعه نتلاقه في محل الاسكريم عادي
مروة { اكيد ح يقول لي انه مستحيل يجي المكان داك تاني و انه اخوها و كدة
هديل { اي صح ح يقول ليك لكن انتي ح تقولي ليهو انه اخوك مسافر مافيش و عادي
مروة { اها و بعداك ..
هديل { بس .. و انتي في اليومين الجايه لحدي يوم الجمعه م تجيبي معاك تلفونك المدرسه و انا هنا برضو م ح اديها تلفوني نهائي عشان م تتواصل معاهو و نتفضح فهمتي ؟
مروة { فهمتا .. اها و بعداك
هديل { بعد دا ح نخش في الصعب .. لكن قبل كدة انتي م بتعرفي محمد دا يعني قصدي م بتعرفي شكلو صح
مروة { اي ..
هديل { لازم تعرفي شكلو .. خلي قصي صحبك يرسل ليك صورة ليهو تمام
مروة {تمام اها و بعداك شنو
هديل { مزن اخت محمد الصغيرة
مروة { سجمي .. صغيرة قدر كيف كمان
هديل { عندها 12 سنه امتحنت الاساس السنه دي لكن ي بت والله تشوفيها تقولي م شافعه يعني جسمها براهو زي جسمنا
مروة { اها اها عايزة تعملي شنو انتي
هديل { محمد بحب اختو دي شديد و بخاف عليها شديد و م برضى فيها الهبشة .. المهم انا قبل فترة كان حضرتا عيد ميلادها و عندي رقمها و هي زاتها عندها واتس و فيس و انستا ..المهم انا ح ارسل ليها و اتونس معاها عادي بس ان شا الله م تكون عارفه انه انا و محمد انفصلنا .. مع انه م اظن تكون عارفه يعني اخوها ح يقول ليها انا خونتا هديل حبيبتي .. اكيد.ح تكون فاكرة اني لسه حبيبتو صح
مروة { ممكن برضو اي
هديل {.طيب يلا انا ح اقول ليها اني عامله لي محمد مفاجاءة و .. ....
*هديل فهمت مروة الفكرة و الخطة ال ح يعملوها كلها و نحنا ح نخش فيها و في الحصل طوالي ..*
*فعلا تاني يوم مروة اتكلمت مع محمد على اساس انها ريان و قالت القالتو ليها هديل .. في نفس اليوم بليل هديل كانت واقفه برة في الشارع و اول م خالد جاي داخل بيتهم .. هديل وقفتو و قالت ليهو عايزاك في موضوع بس ي ريت تفهمني براحه ..*
*هديل اتكلمت مع خالد و طوالي دخلت البيت و فتحت الواتس حقها و رسلت لي مزن ..*
هديل { ازييييييك ي مزن
مزن { بخييير والله
هديل { وينك ياخ مشتاقين
مزن { كتير والله
هديل { عايزاك تساعديني ي مزن عايزة اعمل مفاجاءة لي محمد
مزن { اكيد طوالي
هديل { طيب يلا اسمعيني .. في محل اسكريم في اركويت اسمو (...) يلا انا عايزاك تجيبي لي المحل دا بس طبعا م تكلمي اني قلتا ليك حاجه
مزن { كيف لكن اجيبو المحل دا
هديل { سؤال منطقي.. انتي ح تقولي ليهو انك سمعتي بالمكان دا من صحباتك و عندو اسكريم حلو شديد و نفسك تجربي .. يلا محمد مستحيل يرفض ليك طلب و اكيد ح يجيبك ..
مزن { اي اي اصلا م بقدر يقول لي لا ..
هديل { طيب حلو .. بس ح تقولي ليهو انك ماشه يوم بكرة ال هو الجمعه بعد المغرب طيب ..
مزن { طيب
هديل { م تكلمي من الليله كلمي بكرة طيب
مزن { هههه ح يفرق فشنو
هديل { ي الله ي مزن م تخربي لي مفاجأتي
مزن { ههههه طيب طيب
هديل{ عسل انتي
مزن { عااااارفه
هديل { يلا انتي مش اتصورتي يوم عيد ميلادك صور ليك براك حلوة كدة ..
مزن { اي ..
هديل { م وريتيني ي كللبة
مزن { ثواني اسي برسل ليك
هديل {.طيب ..
//
*مر اليوم التاني و ريان م كانت لاقيه طريقه تتكلم مع محمد و كانت زهجانه شديد ..و الليله الجمعه و كان عندهت قرايه شديدة ..اما بالنسبه لي محمد كان فرحان على اساس انه ح يلاقي ريان الليله و هو قاعد كدة جات اختو مزن و قالت ليهو انه في مكان في اركويت الاسكريم بتاعو سمح و عايزة تجربو و حنستو كتير .. محمد لقاها فرصه كويسة اصلا دا نفس المكان ال ح يلاقي فيهو ريان و قال ليها خلاص م مشكله .. مزن قالت ليهو نطلع بعد المغرب .. محمد قال ليها اي اصلا طوالي بعد المغرب ...*
*قبل المغرب بشويه ..مروة اتصلت على هديل ..*
مروة { اها
هديل { ان شا الله خير المهم اول م مزن ترسل لي انهم وصلو انا ح اوريك عشان تتحركي تجي ..
مروة { طيب .. طبعا قصي قبل شويه اتصل علي و قال لي كلام خطير شديييييييد
هديل { شنو ؟
مروة { قال لي انه لازم تقولي لي صحبتك ريان دي تبعد من الولد الاسمو محمد ..طوالي ق
متا قلتا ليهو لي في شنو .. اتخيلي بس قال لي شنو
هديل { شنو ؟
مروة { قصي طلع بعرف واحد اسمو امجد صاحب محمد و امجد كان بتنونس معاهو ونسه الاصحاب دي و مع الونسه و كدة امجد حكى ليهو انه عندو صحبو اسمو محمد بعرف بنات كتيرة و بحب كم بت و حاليا اتعرف على بت شافعه اسمها ريان و عايش معاها ايامو .. و قال لي مما عرفتا كدة قلتا لازم اجي اقول ليك خليها تبعد منو
هديل { بس كدة اتاكدنا ميه في الميه انه بلعب بيها و دا اكبر دليل عليهو لو فكر يكذب و خبرك دا جا في الوقت الصح..
مروة { مش
هديل { طيب يلا اجهزي عشان الوقت جا
مروة { طيب ..
//
*بعد المغرب كدة محمد و اختو مزن وصلو المكان و قعدو و مزن رسلت لي هديل انهم وصلو .. و هديل طوالي كلمت مروة..*
*شويه كدة مروة وصلت و شافت محمد و مزن قاعدين و جات وقفت جمب محمد و قالت ليهو مش انت محمد .. محمد قال ليها اي .. قالت ليهو عايزاك دقيقه ..محمد عاين لي مزن و قال ليها خليك قاعدة هنا دقيقه .. و زحا شويه وقف مع مروة ..*
محمد { نعم منو انتي
مروة {انا مروة صحبت ريان
محمد { اهااا
مروة { ريان قالت لي اجيك
محمد { اها .. وينها هي
مروة { هي م ح تقدر تجي هنا لانها خافت انه اخوها يكون موصي زول من هنا لو قعدت مع زول غريب تاني بالزات معاك .. عشان كدة قالت لي اجي اقول ليك تعال جمب شارع بيتهم عايزة تديك حاجه و كدة
محمد { اهاااا .. خلاص ثواني انادي مزن
مروة { لالالا خليها عادي م بتجيها حاجه اصلا 5 دقايق و ح تجي راجع ليها ..
*محمد عاين لي مزن و اشر ليها بي يدو انه تكون قاعدة هو اسي جاي راجع .. و مشي مع مروة ..*
*مزن و هي قاعدة براها ماسكة تلفونها فجاءة جا زول قعد جمبها ..*
مزن { منو انت ؟؟
#فتاة_أحلامي
#يا_شيييييييييخة
بقلم .. كيمو 🍟
♤10♤ الاخيرة ##
*مزن و هي قاعدة ماسكة تلفونها فجاءة في زول كبير كدة تقريبا قدر اخوها او اكبر قعد جمبها ..مزن عاينت ليهو و قالت ليهو انت منو ؟ رد ليها و قال ليها انا اسمي مؤيد و الملقب بي زول مقالب .. مزن عاينت ليهو بي زهج كدة و قالت ليهو اها و يعني .. احسن تقوم لانو لو اخوي جا لقاك قاعد جمبي ح يزعلك ..*
مؤيد { انتي كدي اسمعيني اول ..
مزن { اها
مؤيد { انا اخو هديل
مزن { هديل اصلا م عندها اخوان
مؤيد { هههه قصدي ود خالتها ياخ .. اصلا معتبراني زي اخوها يعني دايما بتقول لي اخوي و كدة حتى قبل كدة امي قالت لي خالتي لما كنا مشينا ال.....
مزن قاطعتو { انا مالي بي قصصكم دي .. عايز شنو انت ياخ
مؤيد { المهم انا اصلا بعمل مقالب و كدة لو شوفتي صفحتي في الانستقرام ..
مزن { ي ربي الخلقت الناس ..
مؤيد { هديل كلمتني انها عامله مفاجاءة الليلة لي محمد و كلمتني انك جايه معاهو .. يلا المفاجاءة اول شي ح تبدا بي مقلب صغير كدة
مزن { مقلب شنو ..
مؤيد { حاليا اخوك ح يجي راجع بعد شويه و ح يلقاني قاعد معاك .. يلا طبعا ح يسألني انا منو صح .. طوالي انا ح اقول ليهو انا حبيبك انتي .. طبعا ح يقوم يتنرفز صح و ح يقول ليك الزول دا بقول في شنو .. يلا انتي طوالي ح تقولي ليهو اي دا حبيبي و ح نقوم ح نتكلم على الاساس دا طيب و على فكرة عندي ناس بي كميرات و بصورو من بعيد بس انتي م شايفاهم .. هديل طلبت مني المقلب دا اعملو فيهو و بعداك هي ح تدخل بي المفاجاءة العاملاها ليهو .. المهم انتي لازم تسمعي كلامي عشان المقلب يطلع فيهو حلو طيب و م تخافي يعني مهما هو كورك او حتى ضربني م تقولي ليهو حاجه انا براي ال ح اقول ليهو دا مقلب و في واحد صحبي ح يخش في المقلب برضو و ح يجي يقول ليهو كلام برضو طيب و مهما يحصل انتي خليك ساكته عشان المقلب يظبط .. اتفقنا ي مزونة؟
مزن { م عارفه م مطمنة و خايفه .. هديل دي م تجي و تعمل مفاجاتها و خلاص تريحنا
مؤيد { اي ح تجي بس لازم نظبط المقلب دا طيب و بعدين لما ينزل في الانستا ح يكسر الدنيا و ح يجيب مشاهدات كتيرة و لايكاتتتت
*بالنسبة لي محمد مشى مع مروة مسافه شارعين كدة و بقو واقفين على اساس منتظرين ريان تجي و مرت 10 دقايق ..محمد زهج و قال ليها مالها اتاخرت كدة .. مروة قالت ليهو م عارفه والله . . محمد قال ليها انا خليت مزن براها و م بقدر اتاخر عليها اكتر من كدة .. مروة قالت ليهو خلاص ارجع اقعد معاها و اول م ريان تجي انا بتصل ليك تعال في المكان دا .. محمد قال ليها تمام ..*
*فعلا محمد رجع و اول م وصل من بعيد شاف في زول قاعد مع مزن و بضحك معاها .. مؤيد اول م لاحظ ليهو جاي قال لي مزن خلاص استعدي جا جا ..*
*محمد وقف جمبهم و عاين للزول مسافه و قال ليهو منو انت ؟؟؟*
مؤيد { براحه خلاص
محمد { منو انت؟
مؤيد { انا حبيب مزن
محمد { حبيب منو ي ظريف انت ؟؟؟
مؤيد { حبيب مزن .. مش انت اخوها
محمد { لالا كدي خليك مني .. خلينا فيك انت .. حبيبها من وين و كيف ..
*محمد.عاين لي مزن و لقاها ساكتة قال ليها { بقول في شنو الزول دا .. بتعرفي ؟*
مزن بي صوت واطي قالت ليهو اي ..
محمد بدا يعلي صوتو { انت حيوان ولا شنو قدرك اسي البت دي .. من متين بتعرفها
مؤيد { من زمااااااان
محمد { زماااااااان ؟؟؟ لا بلاي كنتا بتشيلها في كتفك و تفسحها يعني ..
مؤيد { ههههه لالا م للدرجه دي ..
محمد { و بتضحك ؟؟ ..
*محمد مسك مؤيد من قميصو و رفعو خلاهو يقيف و الناس كلها بقت منتبهة معاهم .. و مزن بتعاين لي مؤيد و كانها بتقول ليهو خلاص قول انه دا مقلب عشان م تتأذي ..*
*محمد و هو ماسك و خانق مؤيد من قميصو و بي صوت عالي قال ليهو من الليله م عندك بيها علاقه الا و ديني و ايماني امحيك من الدنيا دي ..و طوالي ضربو بنيه قويه بي يدو لمن مؤيد رجع لي ورة .. في اللحظه دي طوالي خالد كان بعاين من بعيد و سريع جا و فكا مؤيد من محمد و قال و وقف قدامو .. محمد اول م شاف خالد اتخلع و م عرف يعمل شنو و طوالي قال لي مزن قومي ارح .. مزن من الخلعه م قدرت تفتح خشمها اصلا ..*
خالد وقف قدام محمد و قال ليهو { على وين ي .. بس عندي ليك سؤال واحد.
محمد كان ساكت بس ..
خالد { لو م بترضى في اختك .. بترضى في بنات الناس ليه ؟؟؟؟ .. ليه ترضى فيهم .. اختك دي زيها زي اي بت .. كيف م ترضى فيها و ترضى في بنات الناس .. مع اني اول مرة احترمتك و اتكلمتا معاك بالعقل و قلتا ليك ابعد من ريان .. ريان لسه شافعه .. ريان م عارفه مصلحتها .. انت م قدرها .. و لا كاني قلتا ليك حاجه و من تاني يوم انت اتكلمت معاها ... قايلني م ح اعرف .. عرفتا
مزن { في شنو ي محمد
محمد { لالا ماف حاجه .. اصبري اسي ح نمشي
خالد { خليك معاي انا بتكلم ولا اقول ليك ماف كلام اصلا تاني ..
*في الوقت دا هديل كانت مع ريان في البيت و اول م مروة اتصلت ليها قالت ليها تعالي طوالي قالت
لي ريان تعالي معاي .. ريان قالت ليها على وين ..هديل قالت ليها تعالي بس .. و سريع طلعتها مكان الاسكريم و وقفو من بعيد و قالت ليها شوفي .. ريان شافت محمد و خالد واقف معاهو و محل الاسكريم كلو بتفرج ..*
*مؤيد وقف ورة محمد و مسكو ..محمد طوالي ضرب ليك محمد كف زي الكف و قال ليهو دا عشان اختي و تاني ضربو كف و قال ليهو دا عشان هديل و تاني ضربو كف و قال ليهو دا عشان مؤيد و بعداك مؤيد فكاهو .. مزن طوالي بقت تبكي و مسكت محمد و م فاهمة حاجه و محمد من التلاته كفوف بقى م قادر يقيف اصلا ..و قال ليها ارح ارح ي مزن ..و قبل م يصلو العربيه محمد لانو عندو سكري بالجد فجاءة جاهو انخفاض في نسبه السكر و حسى بي دوخه و طوالي وقع و سريع سريع في شباب لحقو و رفعو في العربيه و طوالي على المستشفى ...*
*ريان كانت واقفه بتعاين من بعيد و زعلانه شديد و خايفه من خالد ..و بتعاين لي هديل و مستغربه من الحصل دا .. هديل قالت ليها ح افهمك اي شي لمن نرجع .. فجاءة مرام جات وقفت جمبهم و سلمت على هديل و على ريان .. ريان لما شافتها اتصدمت و قالت ليها الجابك هنا شنو ي مروة ...هديل قالت لي ريان قلتا ليك ح افهمك اي شي لما نرجع ..مروة قالت ليهم يلا انا ماشه و مشت طوالي ..*
*خالد جا وقف جمب ريان و هديل و ريان طوالي بدت تدمع و عايزة تبكي .. خالد قال ليها .. لي م سمعتي كلامي .. ريان م قدرت ترد عليهو و كانت خايفه منو شديد ..هديل قالت ليهو خلاص ي خالد الموضوع على كدة انتهى و ان شا الله ريان مستحيل تكرر غلط زي دا و انا ح اقعد معاها و ح افهمها اي شي .. ريان قلبها واسع و ابيض و اي زول ممكن يغشها زي م كتير من البنات مغشوشات من اولاد كتار شديد ..*
خالد { فعلا ..و اسمعوني انتو الاتنين .. من هنا و لي قدام م تعرفو ليكم اي ولد غريب من الواتس ولا من انستقرام ولا من فيس و تتكلمو معاهو و تتعلقو بيهم ..لانه اكثر الاولاد ديل اولاد م كويسين و مستحيل واحد فيهم يكون جادي و يحب ليهو بت حتى بدون م يشوفها .. ماف حب بجي كدة اصلا .. م تصدقو ليكم اي زول في الدنيا دي يقول ليكم انه معجب بيكم و هو لسه م شافكم .. مستحيل خليكم واعيات شوية و م تتغشو تاني لانو الاولاد كلهم كدة ..و بعدين انتو لسه صغار على الحب و الارتباط و الكلام دا ..م عشان خلاص ح تخشو الجامعه السنه الجايه معناها كبرتو خلاص .. لسه بدري عليكم .. خلو بالكم من بعض و م تتعرفو على ولد تاني بالتلفون نهائي ..
ريان و هديل { حااضر
هديل { خلاص نرجع البيت
ريان { يلا ..
*فعلا رجعو البيت و هديل حكت لي ريان الحصل كلو و اي شي فكرو فيهو هي و مروة .. حتى مؤيد ود خالتها ساعدهم و خالد كمان لما كلمتو بالفكرة اتفهمها و كدة .. ريان اتاسفت لي هديل كتير على العملتو معاها و هديل قالت ليها مسامحاك ...*
*بعد كم يوم هديل كانت قاعدة مع ريان و بتونسو و بضحكو .. قامت جات منار اخت ريان الكبيرة داخله من الجامعه و قعدت معاهم و قالت لي ريان عايزة اتكلم معاك .. طوالي هديل قالت ليهم طيب انا ح اعمل ليكم عصير و مشت المطبخ ..*
منار { انا حاساك متغيرة شديد الايام دي زي الحاصل معاك حاجه .. دا غير انه خالد شال منك التلفون برضو .. في حاجات غريبة بتحصل و انا م عارفه عنها حاجه ..
ريان { اي صح حصلت حاجات كتيرة كنتا بحب واحد و طلع كذاب و موضوع
منار { و لي م بتحكي لي ؟
ريان { انتي ي منار بتحكي لي عن حياتك الشخصيه ؟
منار { حتى ولو .. و بعدين انا حياتي الشخصيه كلها زهج و تعب ..
ريان { كيف يعني
منار { يعني الزول البحبو ليهو فترة متغير معاي .. حتى قبل كم يوم جاتو دوخة السكري قالو كان متشاكل مع واحد و ضربو و كان في المستشفى و موضوع ..و ...
ريان { لا كدي ثواني ي منار .. انتي قلتي سكري ؟؟
منار { اي ..
ريان { حبيبك عندو سكري ؟؟
منار { اي والله للاسف ..
*ريان بصوت عالي قالت لي هديل تعالي ..*
هديل { اهاا
ريان { منار قالت حبيبها قبل كم يوم في واحد ضربو و جاتو دوخة السكري و كان في المستشفى
هديل نططت عيونها و قالت ليها { حبيبك عندو سكري؟؟
منار { ي الله قلتا ليكم اي ..
ريان{ اسمو منو حبيبك دا ي منار ؟
منار { اسمو محمد
هديل { احلللللفي
منار { والله لي مالكم ؟
ريان { و بقرا في جامعه السودان
منار { ايوا صح كيف عرفتي ..
هديل { و ساكن الكلاكله
منار { بسم الله كيف عرفتي انتي كمان ي هديل ..
ريان { و عندو اختو الصغيرة اسمها مزن و بحبها شديد
منار { ح تجننوني .. كيف عرفتووووووووو
ريان { و عندو كلمة كدة دايما بقولها ليك .. يعني بدل اسمك دايما بناديك بيها صح ؟
منار { م فهمت
ريان { يعني كلمه مشهورة كدة هو دايما بقولها.. يعني اسي انا خالد دايما بناديني بي ي زفتا مثلا
منار { اااااا فهمت فهمت اي .. بقول لي ياا..
ريان { استني استني ..
منار { اها شنو
ريان عاينت لي هديل و عاينو الاتنين لي منار و بي صوت قالو ليها .. { يا شيييييييييييييييخة