......لغات فاسدة
مشيت فى طريق وكان نازف
وكله دموع
بَلف ورايا وأتأمل فشوفت
الدنيا فى عيونها أمل موجوع
لاقيت أحلامها مقموصه
وكل فروعها مقصوصه
ندهت كتير ماهش سَامعه
ضعيف لونها ونظرة عينها مش لامعه
فضلت أَواصل المشوار
لاقيت كلمة وجواها بيغلي ف نار
بتشكي حالها للدنيا وبتخبي كتير أسرار
سألت قالولي مقصوصه عشان معترضه ع الأوضاع
دي كلمه قديمة من يومها وخايفه
فى وقت تبقي مشاع
وتتحول من المَلكه فى قاموس جيلها
وفجأة تكون من الأتباع
ف وسط السوق يقوم ليها مزاد تتباع
وتصبح ع اللسان كدبه لا فيها
وفاء ولا عفه ولا حتي تكون وصفه لقلب ما داق حنين الشوق
وتترميَ فى قلب شقوق
ويحدفها الهوا للريح وتطلع
فوق
وتنزل تكوي ف المجاريح
سألت الكلمه مين أنتِ؟؟
وليه الهم والأحزان؟؟؟
فجوبت بس مخنوقة
أنا للقلب كُنت أمان
أنا الضحكه اللي مفلوقه
أنا ل أهل الهوي عنوان
أنا الاُلفه وأنا الوجدان
أنا الكلمة اللي ضاع معني الحروف فيها
أنا البسمه اللي طارت نص معانيها
أنا اللي بقيت مجرد كلمة تنطقها
بدون إحساس
بقيت عُمله بقيت رُخصه ل كل مَداس
رصيد ف البنك يتوزع ما بين الناس
أنا من الأخر أبقي( الحب )🤫
دا لما كُنت ليا حروف جميله وَافية
توزني بميزان حساس
لكن دلوقتي صابني الخوف
بقيت فى الدنيا منسيه مليش لازمه
مجرد كلمة منداسه ب ميت جزمه
عرفت أنا ليه خلعت حروفي من معجم لغات فاسدة
أخرها تبص ع المادة
ما بتفرق بين الاندال
ولا تعرف حرام وحلال
ولا بتميل ل راحة البال
حروف معحونه ف الاوحال
وأنا غيرهم ولا عمري هكون ديلهم
ولا هأبكي ..ولا هتهان
هاعيش فى مكان بعيد عنهم
هاحافظ ع الكيان لو كان
هافارق معجم الأوطان
وهَارجع بالزمن ل زمان
لناس تعرف معاني الحب
وجواهم ....هعيش فى أمان
وجواهم ....هعيش فى أمان
✍ هدى النحاس
