ليست كلُ الجدرانِ قبيحةً .. ما أجملهُ جدارٌ أمام ماضٍ كريه .
بَشَر بايت
=========
صابح يا عيش فى إيدين بَشَر بايت
كل اللى ييجى ب يلعن الفايت
الشِعر دخل الفرن .. ماطلعشى
والشُّعَرا عيش ..
م الخوف طلع شايط .
قلبى الموارب عمرى فيه مفتوح
لا سكوتٌه صمت ..
ولا بكلام ب يبوح .
ينطق لسانى ..
عكس وَجَع الروح
يغنّى وقت ماقلبى يتزلزل
وف عز ما اطلع للسما .. ينزل
يسكن قصور على رمل أوراقى
يشغِل سطورها ..
ويرهَن الباقى .
من المراكب والشجن والفوارس
ومن سمك ب يسد جوع النوارس
ومن بنات متعلَّقين بالشط
أنا البليد ..
ب اكتب ب أسوأ خط
طلب ب جوز أحلام ..
مع البيتزا .
وانا قلبى مشوى ..
فاضل السَلَطات .
تبدأ وليمه ..
وتكتَر البَرَكات .
مع كل إيد تتمد وتدوقه
ترمى البُهار والشطَّه ف عروقه
وتسمّى بسم الماضى وتكمِّل
وانا بس ب اتفرَّج وب اتأمِّل
واشيل ف روحى فوق ماتتحمِّل
واقفل بيبانها ..
واسُك ب الترباس
تفضل ف صدرى يادوبك الأنفاس
دخان سجاير أنفخُه ف الهوا
مع قهوه مُرَّه خاليه م السكَّر
تسكر .. وانا أسكَر
نتلاقى فى الفنجان
ونخَلِّفوا قصيده
وجع .. وتنهيده
جوّانا .. وبعيده
كما بُعدى عن نَفسى ف وقت الخوف
أكتب .. وانا مكسوف
وانا شايف ابنى جاى من المدرسه
ملامحُه لون المسا
وقلبه عيش صابح
ف إيدين بَشَر بايت
هوّا اللى حَقُّه يعيش
ملعون أبو الفايت
ملعون ياشِعر اذا كنت ماطلعتش
م الفُرن غير حبِّة كلام ....... شايط .
( من ديوان مطر اغسطس )
