القائمة الرئيسية

الصفحات

أحدث الروايات

الشاعرة القديرة / نادية ذكي في قصيدة. ( اصبر شويه )

اصبر شويه
اصبر حتى اللحظه ديه
لما ألم جروحى بإيدى
لما تخرج من وريدى
لما أصوم وأستنى عيدى
                        لما أنسى إنى الضحيه
               اصبر شويه
بكفاية قاطع أوتار مابينا
واحنا حتى ماتقابلنا
جى ليه وقافل بيبانا
                   ظلمت قلبى وجنيت علي
             اصبر شويه
كت فاكره روحى فى جنه
دا النار فى كفى شايفها حنه
لا البعد فرض ولا حتى سُنّه
               فارقتنى روحى وأنا لسه حيه
            اصبر شويه
من غير جناح خلتنى طايره
فراشه سارحه فى الدنيا حايره
خنقت روحى فى جوه دايره
                     وبتملا كاسك من عنيا
           اصبر شويه
أصبر أما يبان نهارى
ساعتها آخد فيك قرارى
وتبقى جنبى وآخد بتارى
                   بأمر قلبى إللى جاى عليا
          اصبر شويه
هل اعجبك الموضوع :

تعليقات