أخر الاخبار

سجال شعري بين الشاعره / بدريه محمود هاشم ومجدي فرج عامر نتمني أن يحوز رضاكم

سجال شعري بين الشاعره /  بدريه محمود هاشم ومجدي  فرج عامر نتمني أن يحوز رضاكم

بدريه 
وأزاى تقدر يوم  تنسانى
وتحب دموعى وأحزانى
لو هاتشهد قلبك وحده
هاتحس الوحده وهتعانى

مجدى
إنتي إللي  غادرتي قفلتي  الباب
إنتي إللي لقيتك بايعاني
قلبي إللي فتحلك شبابيكه
من بعد بعادك بيعاني

بدريه
بيعانى إزاى وأنت الجانى
قطعت بصل فوق أوجاعى
والحب إن جالك أو جانى
هتبص بقسوه ايه الداعى

مجدى
وبنسال ونقول إيه الداعي
والحب خلاص ما بقاله بريق
قلبك كان واقف ف وداعي
مع إني حقيقي بجد برىء

بدريه
وبراءه إيه وقلبي ايه ذنبه
كان كل جريرته ف يوم حبك
وف لحظه هان وعليك بعته
مع إنه بيتمنى ف قربك

مجدى
قربك دا رجايا وبأتمني 
ترجعي عن بعدك وتتوبي
ونحقق مع بعض آمالنا
تنسجي علي نولك يوم توبي

بدريه
التوب الابيض حضرته
والطرحه بتل وشغلاها
والقلب لوحدك فرحته
والدنيا ف قربك محلاها

مجدى
ما أحلاها الضحكه إللي ف عينك
والحسن المرسوم ع خدودك
والرب إللي يعيني  يعينك
بجواز سفري حاعدي حدودك

بدريه
دي حدود مرسومه وبالالوان
 رابطه لنا قلوبنا ومش بكلام
محفور أسامينا ف ألف ديوان
نتقابل ف منامنا وأحلااااااام

مجدى
اسمك محفور جوه قليبي 
وباحس دفاكي يفوت فيه
ما أعرفش إن إنتي أما تغيبي
الحزن حيسكن في عنيه

بدريه
وعيون قلبي عليك بتشاور
يامجننى وسارق فكرى
لكن ليه ف حبك بتناور؟؟
وأهو قلبك ويايا ف صدرى

مجدى
صدرك كان ملعب لخناقنا
وأحاسيس جوانا بتتعارك
طب إيه اللي ف يوم جه عاقنا؟ 
وأزاي راح نرجع نتشارك

بدريه
نتشارك دنيا بحلاوتها
وعيال فرحتنا وزينتها
وبضحكه يدوب كل خلافنا
والقرب مزينه بسمتنا

مجدى
بسمات علي الشفه بتترقص
فرحانه بجد بلمتنا 
والناس حوالينا بتتطقس
وعلينا حنقفل باب بيتنا

بدريه
الباب مقفول وعليه حراس
وعيونك قسمتى ونصيبي
هنعوز م الدنيا ايه تانى خلاص
وبعادنا دا كان سر لهيبي

مجدى
دا لهيب الشوق سهر قلبي 
وفضلت أسامر طيفك ليل
وأتمنيتك جنبي وقربي 
عشقك ج جرفني كإنه السيل

بدريه
سيل أشواقك وجرفنى معاه
ولقيت قلبك نسانى الآه
وحلمت كتير عشقك ودفاه
وفرح روحي  وياك ولقاه

مجدى
دا لقاكي الحلم إللي حلمته
من قبلك كنت في دوامه 
قلبك وحضنته وفهمته
وهمست ف ودنه كلام ياما

بدريه
واهو ياما  كتير إستنيته
قولت دى أحلام
ياما كنت اهرب  وأترجيته
يبقالى حقيقه ومش ف منام

مجدى
في منامي باشوفك قدامي 
كبنات الحور
وأنا بأحلف لو فيها إعدامي 
ليكي اعدي بحور

بدريه
دى بحور العشق
كتير ياما وأنا خايفه أغرق
وتاخدنى الدنيا ف دوامه
 لطريق مفهوش أبدا مفرق

مجدى
مين قالك يوم إني مفارق
وبعادك أبدا مش فارق
طب دا إنتي الدنيا وجنتها
وأنا مغرم ف بحورك غارق

بدريه
غارق وسايبنى لوحديا
طب فين الشوق والملاغيه
لو توهت  ف  بحر عنيك مره
حتكون لي انت الشبكه و ميه
 
مجدى
سنارة العشق اوام غمزت
والقلب اصطاد البلطيه
مع انها همزتلي ولمزت
فيش غيرها اللي ملت لي عنيه

بدريه
وعنيك فنجان بعسل مليان
وخدودك شطين حنيه
وابعد ياشيطان غور عنا اوام
وكفايه علينا الملاغيه

مجدي
عصفوره وطايره مع الغيه
انا قلبي لمحها وقال هيه
دي معاها حكمل مشواري 
ولا عمري راح اشبع ملاغيه

تم بحمد الله ..

تعليقات



حجم الخط
+
16
-
تباعد السطور
+
2
-