القائمة الرئيسية

الصفحات

أحدث الروايات

تواصلٌ وقتُ إنقطاعِ الإشاره رجيم أحلام .. خالد عاطف ابوالعزم

تواصلٌ وقتُ إنقطاعِ الإشاره  
                  رجيم أحلام  
               ==========
زى البرشام .. ع الريق باقابلها
مش عايز 
لكن حتمى
ما اقدرشى اختار ألم الوِحده 
ف باقلل ألمى
مورفين إنسانى 
يمكن ب يساعد .. وقتى .. على النسيان 
وب يثبت صحة نظرية دارون 
إن الإنسان حيوان 
واضيف .. ب يحب 
أوقات من كُتر ما يتألم 
يحتاج اللب 
مش يتسلّى .. لأ يتقلّى 
على نار العجز
وقت امّا الدنيا تكون حقنه 
ونصيبك وَخز
أوقات الدنيا تكشَّر لَك ..
بصعوبه تنام 
وتحُطَك بالإكراه فى رجيم أحلام 
أحياناً تقدر تتحمِّل لمَّا تمرَر  
وساعات تتجن ..
وتدلُق ع الأحلام سكّر 
و الدنيا  .. لا هيّا ب ترضَى 
ولا ح تسُر
دايما ف الضعف ياصاحبى .. تغُر 
وساعتها السكّر يعمل إيه ف القلب المُر !!
مليانه ل غيرَك .. ول حَدَّك فاضيه الفتارين 
وب تفضَل سايق عربيه .. من غير بنزين
الحلم .. بضاعة مُستهلِك .. مش للتخزين
وماهوش موقوف  
قيد التحقيق  
أو قيد الحبس 
ولا حَق وجوده ب يتحمّل .. تأويل .. أو لَبس
إزاى ح يكون موجود مع ناس مش موجوده ؟
أصحاب الحلم ب يتنقّوا .. زى الدوده 
واحنا ب نترَش ب مانع شوق  
لا نقرّب من حلم .. ولاندوق 
غير الأحلام الصدَقَه 
م الإيد الصَدِئه
أحلام من كُتر الكدب بقِت شبَه الجُرنان 
فى الزور .. فيضان 
مورفين إنسانى 
ويَّاه نترقَّى .. احنا .. ودارون .. ونكون  حيوان .
______________________
داروين : هو العالم تشارلز روبرت داروين صاحب نظرية النشوء والإرتقاء التى تطرح  تصوراً لنشأة وتطور الكائنات الحيه .

هل اعجبك الموضوع :

تعليقات