أخر الاخبار

الشاعرة القديرة / هدي النحاس في قصيدة ( بكام)

بكام توب الأمان دلوقت ؟؟
بكام الروح  ؟
بكام البخت ؟
وليه وقع الضمير فى  الفحت!!
وكام تمن  الرجوله يا خلق ؟؟؟
بكام  الطيبه والهيبه؟

بكام كرامتنا يا وهيبه؟
بشوف  للدنيا  تغريبة
ملانه    بحقد   وكئيبه
وليه ضاع الزمان ف الوقت
    سنين بتفوت
بكام الموت ؟؟؟؟؟؟
بكام صوت الدموع بسكوت ؟
وليه فرحتنا متشاله ف قلب تابوت
وليه  الخوف وليه الظلم طال الجُوف؟؟؟
وليه بصر الحياء مكفوف!!
وليه إيد النداله كفوف!! 
يا ريت رمز العداله يشوف
وجع مألوف ألم  مكشوف 
بقي بينا  دوا موصوف
بكام  تمن العقول دلوقت ؟
بكام الفكر ؟
بكام عمر العريس البِكر؟؟؟؟
وليه وسط الضباب ضاعت
ملامح عمرنا  اتباعت
وليه عطر الحياة  يرحل 
ويفضل صمت ف المنظر
ويفضل  حلمنا  مربوط
يا كل اللي أشتري  روحنا 
وداق الفرح ف جروحنا
وعدي   علينا   ودبحنا
هيجي الدور 
وترجع شمسنا وتدور 
ولون الدم فى عيونكم 
يزيد ونعبي منه بحور 
هناخد حقنا  المهدور 
ونتجمع نجوم وصقور   
ونتعاهد  يكون  الرد
يهز الأرض يروج الكون
يِسَمع فى الفضا ويدوم
......   ......   ........ .....
                                    ✍ هدى النحاس
تعليقات



حجم الخط
+
16
-
تباعد السطور
+
2
-