القائمة الرئيسية

الصفحات

أحدث الروايات

الشاعر نسيم الزراع والشاعر مجدي فرج عامر في سجال شعري


مجدي
من جوه كاس العشق 
أتدلدقت أحلامي
وشربت نص الوجع 
بقي نصها التاني
بتفوت سنين وأعوام 
وأنا تاهت أيامي
نفسي يعود  الحبيب 
يسمع لألحاني
وخوفي ليروح بعيد
 يلقي نغم تاني
من تحت جسر الغرام 
نديت بصوت عالي
قولت لطيور السما 
ترؤف بقي بحالي
وتعلا فوق السحاب 
تسأللي عن قمري
قالت الطيور أنساه 
دا معاه حبيب تاني 

نسيم
ياللي الحبيب فاتك
بلاش تنادي عليه
لو كنت فيه ذاتك
والصوره جوا عينيه
عمره ماكان يبعد
كان ييجي وبرجيله
جنبك هنا يقعد
لما تحن عليه
أوعاك ف يوم تفتكر
إنه حبيب بصحيح
مادام لقربك نكر
وساب لك التجريح 
ولا في حبك شكر
ومعاك ماكنش صريح
يبقي ميستاهل
إنك ف يوم تذكره
وإن شوفته تتجاهل
أصل الهوي بالهوي
مش بالكلام والقول
وإللي يصيبه الهوي
يمشي كما المسطول
يصحي علي صوت الحبيب
وينام علي صوته 
لا صورته عنه تغيب
وف البعاد موته
وإن يوم حبيبه زعل
بيئن ويعاني
إنسي خلاص دنيته
دا معاه حبيب تاني

مجدي
لا لحست يوم  تفتي
ولا عودت ف كلامي
ولا قلبي جه أستسمحه
أو بلغه سلامي
أنا أصلي مدي أمان
ومغلفه محبه
فارش صوان لأفراح
غرقان ف أحلامي
ف الضهر كات طعنته
متسممه بنصله
جري ف الوريد سمني
ماهو كله من أصله
سهمي ف قوسي طويته
وما كنت ليه رامي
الغدر لما يجيك
ف القلب من خلك
لا عمره ليك بيهين
ولا عمره حيقلك
إفرد إيديك للسما
خليك مع الرحمن
تلقي العدا راكعين
ولا حد حيذلك..،،،،..
إن كان غروره ملاه
ماتزيحه عن ضلك
راح تلقي ألف سواه
يتمنوا بس رضاك
أما الخسيس أنساه
ماهو بكره حيضلك......

نسيم
رب الوجود انقذك
من شر أفعاله 
غدره إللي كان منقذك
دامن غرور جاله
إزاي ف يوم يبعدك
وأنت إللي علمته
من قبل ما يسعدك
القلب سلمته
وداديت ف قلبه الهوي
لما كبر جواه
كنت لجراحه الدوا
والدمعه وقت الآ
إوعاك ف يوم تكتئب
ولا ف يوم ترتاب
هيجيله يوم ينتحب
علي قلب زيك داب
عمره ف يوم متقفل
كان فاتح الأبواب
جواه براح السما
والكون ف أحضانه
راسم ملاحم غنا
أحلامه سكانه
رغم إن قلبك عنيد
عمره ما يخضع لأ
شوقك ف نبضه يزيد
وبدمع عينك رق
نار الفراق بتقيد
وتشق قلبك شق
سيبه يجرب فراقك
والبعد عنك يقتله
ومد إيدك ف الوريد
إنزع الزيف الوليد
جوا أحضان البنفسج
راح يموت غدره شريد
وأنت ترجع للحياه

مجدي
انا كنت شايف نور
فارشاه قناديله
كنت أما أحن إليه
باشاورله وأناديله
كان رمز للأخلاص
والطيبه والعفه
إن غبت مره عليه
قطع  مناديله
لو بينا موج وبحار
حتما بأعديله
وأرسي معاه علي بر
وورودي باهديله
وأرخي الحبال للشوق
إن هدا أهدي له
كان بينا ود وعشم
خاني ولعب ديله
لما الغرور عباه
باع الهوي بينا
بأستحقره ما أغباه
الغدر ما ف دينا
وأنا كنت شهم معاه
والعدل مايدينا
ولما خان الغرام
غيرته ببديله.........

نسيم
شوف الخلاصه بقي
وأسمع بقي المضمون
الحب مش دلدقه
ولا بنت متزوقه
بتحط ييجي ميت لون
الحب أصله حياه
مابين قلوب وعيون
القلب يستناه
وان مره تاه جواه
يبقي ولا المجنون
ساقي مراره ف كاس
والنبض له أجراس 
بتسمع النايمين 
وارب بيبان الهوي
خلي الهوي يرتاح
وافرش حواري الروح
بالورد والأفراح 
بلد الحبيب مهجته
جواه بنتكلم
لو يوم تتوه سكته
من حزنه يتألم
وإزاي بتاخد كتبر
من غير ماتديله
لو قلبه زي الطير
يعزف مواويله
يدي بدون تأخير
وأنت إللي بتقصر
وراح وغاب الغرام
حلم الهوي اتفسر
ياللي إنت حبيت وداب
حلم الهوي جواك
إيه يبقي م الأحباب 
غير عمر شيلته معاك
إن يوم تغيب يسألك
طول ليله يستناك
ازاي تقول دا خان
باع الغرام ونساك
لو هو كان خوان
وبجد حبيته
تنسي هواه إزاي
وتطفي قناديله
وتقول لي راح مش جاي
وهبدله بغيره

مجدي
أقرا الكلام وأفهمه
دا أحنا إللي كاتبينه
وأنزل حَواري الحِوار
وأفهم معاني القول
الحرف بنزوقه
وإحنا إللي بنزينه
بالعقل بنفصله
بكلام وحاسينه
تزاويق مع الدلدقه
مين إللي قال دول حب؟؟؟
الحب جوه القلوب 
ف الكفه زاد ويطب
أدرك معاني الحروف
ليه فيها  نار بتصب
مضمون كلامي دهب
والكل عارفينه
الحب أكبر معون
بالعشق غارفينه
وإللي أفتكرته كبير
راح ندلقه ونكب
من يومنا جسر  الوصال
أصبحنا هدينه
والحب فوق ف السما
حضناه سحابة شوق
 بتضل ناس عيشاه
 حامدين وشاكرينه
ليه لما باع الحبيب
حللتله أنه يبيع
ووصفت دنيا الخداع
وكأنها في ربيع
ولما جانا الغلط 
بان حقده ف وريده
وأزاي راح أبلع ظلط
وأنا قلبي مايريده
مثني وتلاث ورباع
ياعمنا القاري
والقلب لاف علي طير
عاشق لتغريده ......

نسيم
فاهم ورب السما 
كل الكلام والقول
ودخلت بالبسمله
وفتحت باب مقفول
لا كان ف قلبي مرض
ولا كان عرض هيزول
ولا كنت عامل حساب
لكلام ماهوش مقبول
وازاي تقول الحوار
وتصنفه بمعني
وتقول بإنه نار
في حوار بيجمنا
وان كلامك دهب
وان كلامنا صفيح
رب العباد لو وهب
تحتاج لميت تصريح
تحتاج لغزل الحروف
بالفن والتنقيح
وانك تشق الشوف
والسمع يبقي صريح
اهل الهوي بالهوي
والعشق له ناسه
وانا قلبي أصله استوي
قطر الغرام داسه
ووهبت روحي ملاك
كل البشر تهواه
اللي في يوم يعشقه
لازم يموت جواه
شفتك ف عيني كبير
قلبك مدي مفتوح
فيك من حنان الطير
وتحن ع المجروح
هابني جسور بيننا
تجمعني بوريدي
راح تمنع البنا
هابني أنا بإيدي
انا عمري ماتجنيت
ولا يوم عليك راح أزيد
أنا اصل ليك حبيت
ودا شيئ ماهوش بالإيد
كل الكلام منك والله كان جارح
ومهما قريت عنك
أنا بردو راح اسامح
يمكن أكون غلطان
إني بدئت القول
صدقني مش ندمان
مهما حوارنا يطول
ياعمنا الإنسان
اوعاك تكون زعلان
وكتير أنا ممنون..،.........

النهايه بحمد الله...
هل اعجبك الموضوع :

تعليقات