القائمة الرئيسية

الصفحات

أحدث الروايات

سجال شعري بين الشاعرة المبدعة هدى سيد والشاعر الكبير مجدي فرج عام - عز البرد

سجال شعري بين الشاعرة المبدعة هدى سيد ومجدي فرج عام - عز البرد

١-
ف عز البرد
نتاقسم دفا قلوبنا
ونخرج من عذاب خوفنا
وننسى الهم....
هدي سيد

٢-
ف عز العشق بألقاكي ف أحضاني
ونظرات عين تتوهني ووخداني
وجوايا سؤال مبهم ماله إجابه
باحسك ليه مع بعادك محاوطاني؟..
مجدي فرج عامر

٣-
ف عز البرد
نجدد ف الغرام شوقنا
ويجري الحب ف عروقنا
كمجرى الدم...
هدي سيد

٤-
في عز البرد تتكعبل مشاعرنا
وتتدحرج معاني العشق لأحضاني
ولا باعرف لفين روحنا ولا صرنا
ولمسات بالدفا منك محاصراني..
مجدي فرج عامر

٥-
ف عز البرد
بنخطف لحظة تسوى كنوز
كما القهوة وصوت فيروز
نعيش الحلم
هدي سيد

٦-
في عز البرد تتاخر بعيد لأحزان
ونتسامر ونتغامز مع الضحكات
وتحضن إيدنا دفا شوقنا إللي ف الفنجان
وهمس الراديو يطربنا بصوت لنجاة...
مجدي فرج عامر

٧-
ف عز البرد
بنحيى الذكرى جوانا
ونلمح ضحكة واخدانا
كحضن الأم...
هدي سيد

٨-
في عز البرد نتغطي بدفا شوقنا
ويبقي العشق جوانا إللي بيسوقنا
ونمضغ حبنا ندوقه علي الشفه
في كاس الحب قربعنا وما فوقنا...
مجدي فرج عامر

٩-
ف عز البرد
عيونا اللمعة جواها
ما حدش قارى معناها
دموع أم ضم..
هدي سيد

١٠-
وتنده عيني لعيونك ترد عليها بالنظره
ويبدأ عشق طوالي جدال ومحاضره ومناظره
ونتهامس ونتلامس. ف بعض ندوب
وتتمنع حاجات فينا لأشواقنااللي مش عاذره..
مجدي فرج عامر

١١-
ف عز البرد
بنتقابل ف أحلامنا
ونتلامس ب أرواحنا
يا ريته علم...
هدي سيد

١٢-
ف عز البرد دب العشق في أوصالي
ونبض غرامنا يشكي للهوي حالي
وفات طيفك لجوايا يدفيني
وحسيت أد إيه إنه صحيح غالي..
مجدي فرج عامر

١٣-
ف عز البرد
بنحكى لبعض بسكوتنا
آلام الثانية ف بعادنا
كما التوأم..
هدي سيد

١٤-
ف عز البرد تسكت فينا كلماتنا
وتتكلم عيون العشق بالنظرات
وتوصل للقلوب بينا سلامتنا
ولا يحوشنا علي غرامنا أبد عثرات
مجدي فرج عامر

١٥-
ف عز البرد
ينام الطفل جوانا
على شروق شمس حضنانا
يسود السلم
هدي سيد

١٦-
ف عز البرد تبعت شمسنا شعاعها
ويتسرسب دفاها يهز وجداني
وف غروبها بنفتح باب نودعها
ونستني شروقها يزورنا من تاني
مجدي فرج عامر ....
تم....

هل اعجبك الموضوع :

تعليقات